ఏపీభవన్ పంపకాల్లో గందరగోళం

-తెలంగాణ ఉద్యోగులు.. ఆంధ్రకు, ఆంధ్రవాళ్లు.. తెలంగాణకు 

-అసంతప్తిలో ఏపీభవన్ ఉద్యోగులు 

-ఘనంగా తెలంగాణ ఆవిర్భావ వేడుకలు

తెలంగాణ రాష్ట్రం ఆవిర్భవించడానికి కొన్ని గంటల ముందు ఎట్టకేలకు ఢిల్లీలోని ఏపీ భవన్‌లో ఉద్యోగుల విభజన ప్రక్రియ పూర్తయింది. హైదరాబాద్‌లోని సాధారణ పరిపాలనా విభాగం ద్వారా ప్రధాన కార్యదర్శి పీకే మహంతి ఉద్యోగులను తెలంగాణ, ఆంధ్రప్రదేశ్ రాష్ట్రాలకు విభజిస్తూ ఉత్తర్వులు జారీ చేశారు. మొత్తం 98 మంది ఉద్యోగుల్లో తెలంగాణ రాష్ట్రానికి 38 మందిని కేటాయించారు. తెలంగాణ ఉద్యోగులు 12మంది ఉండగా.. వారిలో ఇద్దరిని మాత్రమే తెలంగాణ రాష్ట్రానికి కేటాయించారు. మిగిలినవారిలో ఎక్కువ శాతం మంది ఆంధ్ర ప్రాంతానికి, మిగితావారు ఉత్తరాది రాష్ట్రాలకు చెందినవారే కావడం గమనార్హం. ఆంధ్రప్రదేశ్‌కు కేటాయించిన ఉద్యోగుల్లో పలువురు తెలంగాణ వారు ఉన్నారు. 

ఏ రాష్ట్రం వారిని ఆ రాష్ట్రానికి కేటాయించకుండా.. అధికారులకు తీవ్ర గందరగోళానికి తెరతీశారని ఉద్యోగులు ఆగ్రహం వ్యక్తం చేస్తున్నారు. తెలంగాణకు చెందిన అకౌంట్స్ ఆఫీసర్ నర్సింహారెడ్డి, సహాయ రిసెప్షన్ అధికారులు ఉమారాణి, ప్రహ్లాద్ జోషి, సీనియర్ అసిస్టెంట్ (అకౌంట్స్ విభాగం) శ్యామల, రెసిడెంట్ కమిషనర్ వ్యక్తిగత కార్యదర్శులు వందన, దేవేందర్ సిబ్బంది సంగీత, రవిశంకర్ తదితరులను ఆంధ్రప్రదేశ్ రాష్ర్టానికి కేటాయించారు. కాగా, తెలంగాణ రాష్ట్ర ఆవిర్భావ దినోత్సవం సందర్భంగా ఢిల్లీలోని ఏపీ భవన్‌లో తెలంగాణ ప్రభుత్వం తరఫున అధికారిక ఉత్సవాలు జరుపుకోడానికి ఇంకా ఉత్తర్వులు జారీకాలేదు. 

ప్రమోషన్ల కోసమే కుట్ర

ఏపీ భవన్ విభజనలో తెలంగాణ ఉద్యోగులకు తీరని నష్టం జరిగింది. కీలక శాఖలన్నీ ఆంధ్రప్రదేశ్ ప్రభుత్వానికే దక్కనున్నాయి. తెలంగాణకు కేటాయించిన పోస్టుల్లో డిప్యూటీ కమిషనర్, పే అండ్ అకౌంట్స్ ఆఫీసర్, అకౌంట్స్ ఆఫీసర్, అదనపు అకౌంట్స్ ఆఫీసర్, అడ్మినిస్ట్రేటివ్ ఆఫీసర్, ప్రోటోకాల్ ఆఫీసర్ లాంటి పోస్టులేవీ లేవు. ఇవన్నీ కూడా ఆంధ్రప్రదేశ్ ప్రభుత్వానికే చెందుతున్నాయి. ఇప్పుడు తెలంగాణ రాష్ట్రానికి కేటాయించిన 38 పోస్టుల్లో కేవలం రెండు (అసిస్టెంట్ కమిషనర్, లైజన్ ఆఫీసర్) మాత్రమే గెజిటెడ్ ర్యాంకు పోస్టులు. మిగిలిన 36 పోస్టుల్లో 12 నాన్-గెజిటెడ్ పోస్టులు కాగా 24 లాస్ట్ గ్రేడ్ పోస్టులు. ఈ విభజన పట్ల ఏపీ భవన్ ఉద్యోగులు తీవ్ర అసంతృప్తి వ్యక్తం చేస్తున్నారు. ప్రమోషన్లు దక్కించుకోవాలనే ఉద్దేశంతోనే తెలంగాణ ఉద్యోగులను ఆంధ్రప్రదేశ్‌కు కేటాయిస్తూ కుట్రకు తెరతీశారని విమర్శిస్తున్నారు. గెజిటెడ్ ఆఫీసర్ పోస్టులను ఆంధ్రకు కేటాయించి.. అసిస్టెంట్ కమిషనర్‌గా ఉన్న వ్యక్తిని తెలంగాణకు నిర్వహణాధికారిని చేయడంవల్ల మొత్తం అధికారాన్ని తమ చెప్పుచేతల్లో ఉంచుకునేలా ఆంధ్ర అధికారులు పర్సనల్ డిపార్టుమెంటును తప్పుదారి పట్టించారని ఉద్యోగులు ఆరోపిస్తున్నారు.

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!