మాతృ వందన ఫలం

మిత్రులందఱకు "మాతృదినోత్సవ శుభాకాంక్షలు"

భూప్రదక్షిణ షట్కానఁ బొందు ఫలము;

కాశి యాత్రాచరణ మిడు ఘనఫలమ్ము;

సింధువునఁ జేయు స్నాన సంస్థిత ఫలమ్ము;

మాతృ వందన మాచరింపఁగనె కలుగు!

స్వస్తి

విద్య

01

విద్యయన తెలివిగా ♦ విదితమగును;

తెలివియన విద్యయనియునుఁ ♦ దెలియఁదగును;

విద్యయే జ్ఞానమగు వేద ♦ విద్యయగును;

విద్యయే శాస్త్రమగు లోక♦వేద్యమగును!




02

చోరులు గాంచని ధనమయి,

మీఱిన సుఖమిచ్చునదియు, ♦ మేదినిలోనన్

దోరముగఁ బంచియిడిననుఁ

బేరిమితో వృద్ధియౌను ♦ విద్యయె సుమ్మీ!




03

ప్రళయ సమయమందైనను

ఖిలమునుఁ గాకుండునదియుఁ ♦ గీరితినిడి, కే

వల మంతర్ధనముగ నిల

వెలసియుఁ బరిమళము లిడును ♦ విద్యయె సుమ్మీ!




04

భూతమును శోధనముఁ జేసి, ♦ పుటముఁ బెట్టి,

వర్తమానమ్ము వెల్గించి, ♦ ప్రగతిఁ బంచి,

భావితరములవారికిఁ ♦ బ్రాణమగుచు,

యుగయుగమ్ములు జీవించు ♦ "యోగి" విద్య!




05

బడినిఁ దల్లి యొడిగఁ ♦ బరిగణించును విద్య;

గురుని మాతృసముగఁ ♦ గూర్చు విద్య;

జీవనమునుఁ గడపు ♦ త్రోవఁ జూపును విద్య;

హితము, ధనము, కీర్తి ♦ నిచ్చు విద్య!




06

అగుణు సగుణుఁ జేయు ♦ ననువర్తనమె విద్య;

రూపులేనివాని ♦ రూపు విద్య;

కడఁగియుఁ బరదేశ ♦ గౌరవమ్మిడు విద్య;

ధనములేనివాని ♦ ధనము విద్య!




07

దరికిఁ జేర్చి కాఁచు ♦ దైవమ్మెయగు విద్య;

పదుగు ఱెదుట గౌర♦వమ్ము విద్య;

ఘనులలోనఁ బరమ ♦ ఘనతఁ దెచ్చును విద్య;

యిష్టములను నిచ్చు ♦ హితుఁడె విద్య!




08

పాప మార్గములనుఁ ♦ బరిమార్చునదె విద్య;

ధర్మ మార్గ మిడును ♦ కూర్మి విద్య;

మంచి చెడుల మర్మ ♦ మందించునదె విద్య;

సత్ప్రవర్తక పరి♦జనమె విద్య!




09

కూడు, గూడును, గుడ్డయుఁ ♦ గూర్చు విద్య;

సరళమౌ నీతి బోధించు ♦ గురుఁడు విద్య;

బాధ్యతలఁ దెల్పి, నిను మార్చు ♦ బ్రతుకు విద్య;

ఇహపరమ్ముల సుఖము నీ♦కిచ్చు విద్య!




10

ధనమదాంధుల దర్ప ద♦ళనము విద్య;

స్వార్థపరులను సరిచేయు ♦ సరణి విద్య;

భజనపరులను భంజించు ♦ పవియె విద్య;

గర్వులనుఁ జీల్చి చెండాడు ♦ కత్తి విద్య!




11

కొండెగాండ్రకుఁ దలమీది ♦ కొఱవి విద్య;

సోమరుల కెప్డు సూచించు ♦ సూది విద్య;

వంచకుల చర్య లరికట్టు ♦ బడితె విద్య;

నీచులనుఁ గాల్చి నొప్పించు ♦ నిప్పు విద్య!




12

సర్వ కాలాల నిన్నంటు ♦ శక్తి విద్య;

తాను వెలుఁగుచు వెలిఁగించు ♦ తపము విద్య;

పామరునిఁ బండితుం జేయు ♦ పదవి విద్య;

విద్య లేనట్టివాఁడెపో ♦ వింత పశువు!




-:శుభం భూయాత్:-

******************

సుకవి జన విధేయుఁడు

గుండు మధుసూదన్

వరంగల్