తెలంగాణ రాష్ట్రావతరణ పంచమ వార్షిక పర్వ దినోత్సవ శుభకామనలు!

ఉ.
శ్రీకరులై వెలింగెడి యశేష జనావళి సంతసించుచున్
జేకొనినట్టి సాత్కృత విశిష్టయునౌ తెలఁగాణ రాష్ట్రమే
ప్రాకటమౌచు నీ దినమె రమ్యసుశోభిత నవ్యరాష్ట్రమై
మేకొని యేర్పడెన్, జగతి మెప్పుల నందుచుఁ బొంగిపోవుచున్!

ఉ.
నా తెలఁగాణ స్వేచ్ఛగను నవ్వుచు హాయిగ వెల్గునంచు, నీ
నేతలు వీరులుం బ్రజలు నిత్యసుశోభలఁ దేలునట్లు, నేఁ 
డీ తెలఁగాణ రాష్ట్ర మది యెప్పటి నుండియొ వేచియుండ, నౌఁ
గాత మటంచు వచ్చెఁ దెలఁగాణము! స్వప్నము సత్యమాయెఁగా!

సీ.
అఱువది యేఁడుల యాంధ్రాధిపత్యమ్ము
        నంతమ్ముఁ జేయంగఁ బంతమూని,
తెలఁగాణు లందఱ నిల నొక్క త్రాఁటి పైఁ
        కినిఁ దెచ్చి బలమిచ్చి ఘనత నూని,
నీరముల్ భూములు నిధులును గొలువులు
        వనరులం దోచిన పగిదిఁ దెలిపి,
తీవ్రమౌ పలుకులఁ "దెలఁగాణ వచ్చుడో
        కేసియార్ చచ్చుడో" కృత ప్రతిజ్ఞుఁ
గీ.
డైన "కేసియార్ వ్రతదీక్ష", యాంధ్ర పాల
కులకుఁ బ్రక్కలో బల్లెమై, కునుకు నిడక,
చోద్యముగఁ దెలంగాణ రాష్ట్రోద్యమమును
ఢిల్లి కనిపి, సాధించె రాష్ట్రేప్సితమును!

ఉత్సాహము:
"సకల జనుల సమ్మె" చేసి, శాశ్వతముగఁ బ్రజల హృ
త్ప్రకర మందు నిలిచి వెలిఁగి, రాష్ట్ర సాధనమునకై
రకరకమ్ములైన వ్యూహ రచనములనుఁ జేసియున్
బ్రకటిత మ్మొనర్చెఁ బ్రజల రాష్ట్ర కాంక్షఁ గేసియార్!

సీ.
ఒక వంక నమరె సదుద్యమ స్ఫూర్తికై
        తెలఁగాణ జనభేరి దివ్య కృతము;
నొక చెంత నలరెఁ జెల్వొప్పఁగాఁ దెలఁగాణ
        సాగరహార సంజనిత వ్రతము;
నొక చోట మించె సముత్సుక తెలఁగాణ
        జనుల ధూంధాము చేతన గళములు;
నొకట నుజ్జృంభించె నుత్సాహ యుక్తమౌ
        సభ విరాజిల్లు ప్రసంగ ఫణితి;
గీ.
యంత సమ్మెలు హర్తాళు లమర వీర
కలిత బలిదానములు సముత్కంఠ నిడఁగ,
నీ తెలంగాణ మంతయు నెద రగులఁగఁ,
జెలఁగె నిరశన వ్రతి చంద్రశేఖరుండు!

శా.
ఢిల్లీకిం జని కేసియారె యచటన్ దిక్కుల్ ప్రకంపింప ఱం
పిల్లం జేసె స్వరాష్ట్ర కాంక్ష నినదం; బెల్లన్ సముత్కీర్ణ హృ
త్ఫుల్లాంభోజ సభాంతరాళ మలరన్ బోరాడి, సాధించె సం
సల్లీలన్ దెలఁగాణ రాష్ట్రమును నుత్సాహమ్ము దీపింపఁగన్!

తే.గీ.
సకల జనులిఁక సంతోష సౌఖ్యములను
బొంది, వెలిఁగెడుఁ గావుత పూర్ణముగను!
శాంతి కల్గుతఁ దెలుఁగు రాష్ట్రద్వయమున!
స్వేచ్ఛ యెసఁగుత! యభివృద్ధి వేగ గొనుత!!

తే.గీ.
ఆయురారోగ్యభోగభాగ్యైహికములు
సకలశుభముల నొందియు, సౌమ్యతఁ గొని,
నవ్య రాష్ట్రమ్మునం దెలంగాణ జనులు
శుభము లీప్సితములుఁ బొంది, శోభఁ గనుత!!

స్వస్తి

జై తెలంగాణ! జై జై తెలంగాణ!

స్వరాష్ట్ర సాధకుఁడు...ఉద్యమ నేత...కేసీఆర్!

రవీంద్ర భారతిలో మొన్న ఆదివారం నాడు తెలంగాణ ప్రభుత్వం భాషా సాంస్కృతిక శాఖ మఱియు తెలంగాణ పద్య కవితా సదస్సు ఆధ్వర్యంలో జరిగిన పద్య తెలంగానంలో నేను పఠించిన పద్యాలు...

సీసము:
అఱువది యేఁడుల యాంధ్రాధిపత్యమ్ము
        నంతమ్ముఁ జేయంగఁ బంతమూని,
తెలఁగాణు లందఱ నిల నొక్క త్రాఁటి పైఁ
        కినిఁ దెచ్చి బలమిచ్చి ఘనత నూని,
నీరముల్ భూములు నిధులును గొలువులు
        వనరులం దోచిన పగిదిఁ దెలిపి,
తీవ్రమౌ పలుకులఁ "దెలఁగాణ వచ్చుడో
        కేసియార్ చచ్చుడో" కృత ప్రతిజ్ఞుఁ

డైన "కేసియార్ వ్రతదీక్ష", యాంధ్ర పాల
కులకుఁ బ్రక్కలో బల్లెమై, కునుకు నిడక,
చోద్యముగఁ దెలంగాణ రాష్ట్రోద్యమమును
ఢిల్లి కనిపి, సాధించె రాష్ట్రేప్సితమును! (1)

ఉత్పలమాల:
ఈ తెలఁగాణ మాట యిఁక నెప్పుడు వల్కక యుండ నాజ్ఞ నా
నేతయు చంద్రబాబె యిడ; నిత్యము నీ తెలఁగాణ నామమే
చేతము పొంగఁగా వినిచె, శీఘ్ర మసెంబ్లియె మ్రోగఁ గేసియార్!
నేత యతండు రా! ఘన వినీతుఁడు, ధీరుఁడు, పుణ్య మూర్తిరా!! (2)

ఉత్సాహము:
"సకల జనుల సమ్మె" చేసి, శాశ్వతముగఁ బ్రజల హృ
త్ప్రకర మందు నిలిచి వెలిఁగి, రాష్ట్ర సాధనమునకై
రకరకమ్ములైన వ్యూహ రచనములనుఁ జేసియున్
బ్రకటిత మ్మొనర్చెఁ బ్రజల రాష్ట్ర కాంక్ష ఢిల్లికిన్! (3)

సీసము:
ఒక వంక నమరె సదుద్యమ స్ఫూర్తికై
        తెలఁగాణ జనభేరి దివ్య కృతము;
నొక చెంత నలరెఁ జెల్వొప్పఁగాఁ దెలఁగాణ
        సాగరహార సంజనిత వ్రతము;
నొక చోట మించె సముత్సుక తెలఁగాణ
        జనుల ధూంధాము చేతన గళములు;
నొకట నుజ్జృంభించె నుత్సాహ యుక్తమౌ
        సభ విరాజిల్లు ప్రసంగ ఫణితి;

యంత సమ్మెలు హర్తాళు లమర వీర
కలిత బలిదానములు సముత్కంఠ నిడఁగ,
నీ తెలంగాణ మంతయు నెద రగులఁగఁ,
జెలఁగె నిరశన వ్రతి చంద్రశేఖరుండు! (4)

శార్దూలము:
ఢిల్లీకిం జని కేసియారె యచటన్ దిక్కుల్ ప్రకంపింప ఱం
పిల్లం జేసె స్వరాష్ట్ర కాంక్ష నినదం; బెల్లన్ సముత్కీర్ణ హృ
త్ఫుల్లాంభోజ సభాంతరాళ మలరన్ బోరాడి, సాధించె సం
సల్లీలన్ దెలఁగాణ రాష్ట్రమును నుత్సాహమ్ము దీపింపఁగన్! ( 5)

స్వస్తి

మధురకవి, సహస్ర కవి భూషణ

గుండు మధుసూదన్

వరంగల్

మాతృ వందన ఫలం

మిత్రులందఱకు "మాతృదినోత్సవ శుభాకాంక్షలు"

భూప్రదక్షిణ షట్కానఁ బొందు ఫలము;

కాశి యాత్రాచరణ మిడు ఘనఫలమ్ము;

సింధువునఁ జేయు స్నాన సంస్థిత ఫలమ్ము;

మాతృ వందన మాచరింపఁగనె కలుగు!

స్వస్తి

విద్య

01

విద్యయన తెలివిగా ♦ విదితమగును;

తెలివియన విద్యయనియునుఁ ♦ దెలియఁదగును;

విద్యయే జ్ఞానమగు వేద ♦ విద్యయగును;

విద్యయే శాస్త్రమగు లోక♦వేద్యమగును!




02

చోరులు గాంచని ధనమయి,

మీఱిన సుఖమిచ్చునదియు, ♦ మేదినిలోనన్

దోరముగఁ బంచియిడిననుఁ

బేరిమితో వృద్ధియౌను ♦ విద్యయె సుమ్మీ!




03

ప్రళయ సమయమందైనను

ఖిలమునుఁ గాకుండునదియుఁ ♦ గీరితినిడి, కే

వల మంతర్ధనముగ నిల

వెలసియుఁ బరిమళము లిడును ♦ విద్యయె సుమ్మీ!




04

భూతమును శోధనముఁ జేసి, ♦ పుటముఁ బెట్టి,

వర్తమానమ్ము వెల్గించి, ♦ ప్రగతిఁ బంచి,

భావితరములవారికిఁ ♦ బ్రాణమగుచు,

యుగయుగమ్ములు జీవించు ♦ "యోగి" విద్య!




05

బడినిఁ దల్లి యొడిగఁ ♦ బరిగణించును విద్య;

గురుని మాతృసముగఁ ♦ గూర్చు విద్య;

జీవనమునుఁ గడపు ♦ త్రోవఁ జూపును విద్య;

హితము, ధనము, కీర్తి ♦ నిచ్చు విద్య!




06

అగుణు సగుణుఁ జేయు ♦ ననువర్తనమె విద్య;

రూపులేనివాని ♦ రూపు విద్య;

కడఁగియుఁ బరదేశ ♦ గౌరవమ్మిడు విద్య;

ధనములేనివాని ♦ ధనము విద్య!




07

దరికిఁ జేర్చి కాఁచు ♦ దైవమ్మెయగు విద్య;

పదుగు ఱెదుట గౌర♦వమ్ము విద్య;

ఘనులలోనఁ బరమ ♦ ఘనతఁ దెచ్చును విద్య;

యిష్టములను నిచ్చు ♦ హితుఁడె విద్య!




08

పాప మార్గములనుఁ ♦ బరిమార్చునదె విద్య;

ధర్మ మార్గ మిడును ♦ కూర్మి విద్య;

మంచి చెడుల మర్మ ♦ మందించునదె విద్య;

సత్ప్రవర్తక పరి♦జనమె విద్య!




09

కూడు, గూడును, గుడ్డయుఁ ♦ గూర్చు విద్య;

సరళమౌ నీతి బోధించు ♦ గురుఁడు విద్య;

బాధ్యతలఁ దెల్పి, నిను మార్చు ♦ బ్రతుకు విద్య;

ఇహపరమ్ముల సుఖము నీ♦కిచ్చు విద్య!




10

ధనమదాంధుల దర్ప ద♦ళనము విద్య;

స్వార్థపరులను సరిచేయు ♦ సరణి విద్య;

భజనపరులను భంజించు ♦ పవియె విద్య;

గర్వులనుఁ జీల్చి చెండాడు ♦ కత్తి విద్య!




11

కొండెగాండ్రకుఁ దలమీది ♦ కొఱవి విద్య;

సోమరుల కెప్డు సూచించు ♦ సూది విద్య;

వంచకుల చర్య లరికట్టు ♦ బడితె విద్య;

నీచులనుఁ గాల్చి నొప్పించు ♦ నిప్పు విద్య!




12

సర్వ కాలాల నిన్నంటు ♦ శక్తి విద్య;

తాను వెలుఁగుచు వెలిఁగించు ♦ తపము విద్య;

పామరునిఁ బండితుం జేయు ♦ పదవి విద్య;

విద్య లేనట్టివాఁడెపో ♦ వింత పశువు!




-:శుభం భూయాత్:-

******************

సుకవి జన విధేయుఁడు

గుండు మధుసూదన్

వరంగల్

దత్తపద్యారంభము: ఎందుల కిన్ని బాధల సహింతువు...(నచ్చిన అంశముపై పద్యరచన)

*****************************************************************************

తేది: సెప్టెంబర్ 11, 2015 నాటి శంకరాభరణంలోని పద్య రచన శీర్షికన ఈయబడిన పద్య ప్రారంభము "ఎందుల కిన్ని బాధల సహింతువు..." అను వాక్యమునకు కొనసాగింపుగా నేను పూరించిన పద్యము...

******************************************************************************

(సత్యవంతుని ప్రాణములఁ గొనిపోవుచుండఁగాఁ దన్ను వెంబడించిన సావిత్రితో యముఁడు పలికిన మాటలు)

******************************************************************************

ఉత్పలమాలిక:

"ఎందుల కిన్ని బాధల సహింతువు? మద్రసుతా! యముండ నే!

నిందునిభాస్య! నీ మగని నిట్టుల నేఁ గొనిపోవ, నీ విటుల్

సందడిఁ జేయుచున్ వెత వసమ్మున వెంటఁ బడంగ రాదు! కొ,

మ్మింద, వరమ్ము నిత్తు, నిఁక, నీశుని ప్రాణముఁ దక్కఁ గోరి, యే

కొందలపాటు లేక యిఁకఁ గూర్చుమ నాకుఁ బ్రమోద మి" ప్డనన్,

ముందుగఁ గోరె స్వశ్వశురు పూర్వపు వైర్యపహార్య రాజ్యమున్,

సందియ మింక లేక వరుసన్ గనె మామను లబ్ధచక్షుగన్!

గుందుచు వెన్కఁ బోవ, హరి గొబ్బున నింకొక కోర్కెఁ దీర్పఁ, దం

డ్రిం దగఁ బుత్ర సచ్ఛతునినింగ నొనర్పఁగ, నట్లె రాఁగఁ దాఁ

జిందులు ద్రొక్కుచున్ "ముదిత! శ్రేష్ఠతమాంచిత సద్వరమ్మునున్

బొందియు వత్తువేల? యిఁకఁ బోఁగదె!" యంచు ననంగ, నామెయున్

"ముందుగ రెండు కోర్కెలిడి ముద్దునుఁ గూర్చితి విప్డు! నీ విఁకన్

వందన మంది, మూఁడవది వద్దనకుండ మహాత్మ, యీయు!" మం

చుం దన కోర్కి నీయుమన, సూర్యజుఁ డప్పుడు "సాధ్వి! నేఁడు నా

డెందము సంతసించె! నిదె డిగ్గన నిచ్చెద! నాథు ప్రాణముల్

వొందఁగఁ గోరఁబోక మఱి వొందుమ వేఱొక కోర్కి" నన్న నా

ముందఱ భర్తఁ గాంచియు, యమున్ దగఁ గోరెను "దండపాణి! నా

కుం దగు తోడుఁ గొంటి! మది కుందె! సుపుత్రుని నా కొసంగియున్

విందునుఁ గూర్చుమయ్య!" యన, వెంటనె దండి "తథాఽ"స్తనంగ, నా

నందముతోడ, "సౌరి! యెటు నందెద సంతతి? మానవాంగనల్

వొందెద రెట్లు సంతతిని వోఢను వీడియు లోకమం?"దనన్,

దొందరపాటుఁ గన్గొనియు దున్నవయాళికుఁ డంత "సాధ్వి! నీ

సుందర సూక్ష్మ వాక్ప్రతతిఁ జూడ మహాద్భుతమయ్యె! సంతసం

బందితిఁ! బుత్రపౌత్రయుతవై సుఖియింపుము భర్తతోడ! నే

నుం దగఁ బోయి నా విధులనుం దగఁ దీర్తు! శుభమ్ము నీ విలన్

బొందు!"మటంచు దీవెనలు పొందుగ నిచ్చి యగోచరుండయెన్!

జెందొవ చూపు లందముగఁ జిత్రపు నాట్యములాడఁ దాను స్వా

మిం దమితోడఁ జూచుచు గమించిన తత్కథనంత భర్తకున్

సుందరమైన రీతి వినసొంపగునట్లు వచించె! నిర్వురున్

మందగమమ్ములేక కర మందిరి భోగము పూర్వ రీతిగన్!!

******************************************************************

-:శుభం భూయాత్:-

******************************************************************

అమ్మ! దయామయి! సింహవాహనా!!

తెలంగాణ ప్రజలకు రచయితలకు కవి పండితులకు

దసరా పండుగ శుభాకాంక్షలు!!

చండి! భవాని! శైలసుత! శాంభవి! భైరవి! యోగమాయ! చా

ముండి! వృషాకపాయి! సతి! మోక్షద! శాంకరి! దుష్ట దానవో

త్ఖండతరాశుకాండ! వరదాయి! శుభప్రద! భద్రకాళి! పా

షండ శిఖండి! శక్తి! మహిషాసుర మర్దిని! సింహవాహనా! (1)

నేతల నీతిమంతులుగ నేర్పడఁ జేసియు; మమ్ము నేఁడిటన్

పూత మనమ్ము గల్గునటు పూని, వరమ్మిడి, వెల్గఁ జేసియున్;

చేతము చల్లనౌ నటుల శీఘ్రమె కాంక్షలఁ దీర్చి, మాకు నీ

యాతన డుల్చి, ప్రీతిఁ గనుమమ్మ! దయామయి! సింహవాహనా! (2)

నిరతము నిన్ను గొల్చెదము; నిక్కము! నమ్ముము! మా మనోరథ

స్థిర నవ రాష్ట్ర మిచ్చితివి దీక్షలు సేసి, తపించి పోవ, మా

చిరమగు వాంఛఁ దీరిచి, విశేష తమాంచిత హేమ రాష్ట్రమున్

కర మనురాగ యుక్తముగఁ గాంచుచు నీఁగదె సింహవాహనా! (3)

ఆత్రముతోడ వేచితిమి, హర్ష సుహృద్వర రాష్ట్రదాయి! మా

శత్రుల మానసమ్ములనుఁ జక్క నొనర్చియు, వారలన్ సుహృ

న్మిత్రులుగాను మార్చి, కరుణించియు, మమ్మిఁక వేగిరమ్మె స

ద్గాత్రులఁ జేసి, స్వర్ణ తెలగాణము నీఁగదె సింహవాహనా! (4)

ప్రజలను నిత్య సత్య యుత వర్తన శీ లురఁ జేసి, వారలన్

గుజనులు కాక యుంటకయి కూర్మినిఁ బంచి, మహోత్తమాశయాం

బుజ ఘన శోభి తాత్మ నిడి, ప్రోచి, ప్రశస్త సువృత్తతోన్మహా

యజనముఁ జేయు శక్తి సదయన్నిడు మో శివ! సింహవాహనా! (5)

-:శుభం భూయాత్:-

సద్దుల బతుకమ్మా...సల్లంగ జూడమ్మా...!!!

మిత్రులందఱకు బ్రతుకమ్మ పండుగ శుభాకాంక్షలు!

(తెలంగాణమునం బడతు లందఱు బ్రతుకమ్మ పండుగ నాఁ డెట్టుల బ్రతుకమ్మ నలంకరించి, పూజింతు రనఁగా...)

సీ.

తంగేడు పూవులఁ ♦ దాంబాలమునఁ గుండ్ర
.....ముగ నందముగఁ బేర్చి, ♦ మురువు సూపు
వివిధమ్ములగు రంగు ♦ లవి గునుగులఁ జేర్చి,
.....మందార, కట్ల, చే ♦ మంతుల నిడి,
బంతిపూవులు పోఁక ♦ బంతిపూవులు వింత
.....సొబగుల నీనఁగాఁ ♦ జూపరులకుఁ
బ్రకృతి సోయగమంతఁ ♦ బండువు సేయంగ
.....బ్రతుకమ్మ నడుమ గౌ ♦ రమ్మనుంచి,
.
గీ.
ధగధగలతోడి పట్టుపీ ♦ తాంబరములఁ
గట్టుకొనియును మెఱయుచు ♦ ఘనముగాను
కనకదుర్గకు లక్ష్మికిఁ ♦ గడు ముదమున
వందనము సేసి, యర్చింత్రు ♦ పడతులంత!
.
కం.
బ్రతుకమ్మఁ బట్టుకొనియు వ
నితలందఱు నూరి చివర ♦ నిక్కపు భక్త్యు
న్నతి నాడి పాడియును స
న్మతి బ్రతుకమ్మను నిమజ్జ ♦ నము సేతురయా!
.
ఆ.వె.
ముత్తయిదువ లపుడు ♦ పూతురు పసుపును
పుస్తెలకును గౌరి ♦ పూజసేసి!
సన్నిహితులు హితులు ♦ సఖులంత కష్టసు
ఖములఁ జెప్పుకొండ్రు ♦ కలిసిన కడ!
.
తే.గీ.
ఇంటినుండియుఁ దెచ్చిన ♦ హితకరమగు
తీపి వస్తువులనుఁ బంచి, ♦ తినియు, మఱల
సద్దులను మూటఁగట్టియు ♦ సంబరమున
నిండ్లకుం జేరఁ బోదురా ♦ యింతులంత!
.
కం.
బ్రతుకమ్మ పర్వదినమున
నతి సంతోషమున దుర్గ ♦ నవ్యానందాల్
సతులందఱ కిడి, వారలఁ
బతులకుఁ బిల్లలకు స్థిరత ♦ బ్రతు కిడుఁ గాతన్!.

--(::శుభం భూయాత్::)--

.

విఘ్నములఁ దొలఁగింపుము విఘ్నరాజ!

కవి పండితులకు, తెలంగాణ ప్రజలకు, వీక్షకులకు

వినాయక నిమజ్జన దినోత్సవ శుభాకాంక్షలు!

(తెలంగాణ రాష్ట్రమును తొందరగా ఈయుమని దివి: సెప్టెంబర్ 18, 2013 నాడు నేను విఘ్నపతిని ప్రార్థిస్తూ వ్రాసిన పద్యములకు సంతసించిన ఆ విఘ్నేశ్వరుడు మనకు మన తెలంగాణ రాష్ట్రమును ప్రసాదించి మనను బానిసత్వమునుండి విముక్తులను చేసినాడు. అందులకు మరొక్కసారి  ఆనాటి దినమును స్మృతికితెచ్చుకొంటూ ఆ పద్యాలను ఇక్కడ ప్రకటిస్తున్నాను. అప్పటి మన ఆకాంక్షలు ఎలా ఉన్నాయో మరొక్కసారి జ్ఞాపకము చేసుకొనండి సోదరులారా!)

హెచ్చు తగ్గులు లేనట్టి హిత మనమున,
దరికిఁ జేరనిచ్చితిమి యందఱనుఁ బ్రేమఁ
గుఱియ; స్వార్థ మేమాత్రమ్ముఁ గోర మయ్య;
వేగఁ దెలగాణ మీవయ్య విఘ్నరాజ! (1)

మమ్ము బాధించినట్టి సీమాంధ్రులకును

మంచి బుద్ధిని దయసేసి, మమత గలుగు

వారలుగ మార్చి, దీవించి, వరము లిచ్చి,

వేగఁ దెలగాణ మీవయ్య విఘ్నరాజ! (2)

మాయ లేనట్టి వార; మమాయకులము;

కుడు మటన్నఁ బండు వటంచుఁ గూర్మి మీఱ,

సంతతము సంతసముఁ బూని, స్వాగతింప;

వేగఁ దెలగాణ మీవయ్య విఘ్నరాజ! (3)

తెలుఁగు వారందఱును నొక్కటిగను నుండి,

ప్రాంతములుగాను విడిపోవ బాగటంచు,

వేడుచుంటిమి ప్రార్థించి, పేర్మి మీఱ;

వేగఁ దెలగాణ మీవయ్య విఘ్నరాజ! (4)

ఆత్మ గౌరవోద్యమ మిది, యాదరించి,

యిష్టములఁ దీర్చి, యెడఁబాపి కష్టములను,

మమ్ముఁ గరుణింప వేడెద మనమునందు;

వేగఁ దెలగాణ మీవయ్య విఘ్నరాజ! (5)

-: శుభం భూయాత్:-

(గత టపాను ఇక్కడ చూడగలరు: విఘ్నరాజ!)

పోలవరము వరమిడదు, ముంపు నిడును!

(నేను గతంలో దివి:21-11-2013 మరియు 08-02-2014 నాడు పోలవరము నిర్మిస్తే కలిగే నష్టాలను వివరిస్తూ పెట్టిన టపాను మరల ఈ క్రింద ఇస్తున్నాను. పోలవరం ప్రాజెక్టు నిర్మాణం, భద్రాచలం ముంపుకే కానీ మంచికి కాదు. తెలంగాణ ప్రజలు, ముఖ్యంగా భద్రాచలవాసులు దీన్ని ఎంత మాత్రం సహింపరు. అంతగా అవసరం ఐతే పోలవరం డిజైన్ మార్చి, ఎవరికీ ముంపులేని, నష్టం కలిగింపని, తెలంగాణ (భద్రాద్రి)లోని పూచిక పుల్లంత స్థలాన్నికూడా సీమాంధ్రలో కలుపని రీతిగా నిర్మించుకుంటే మాకేం అభ్యంతరం లేదు. తెలంగాణ జోలికి వస్తే మాత్రం రణరంగమే!)

భద్రగిరిఁ బొంది, మీ పోలవరము నిచట

నిర్మితము సేయఁ గుట్రల నెన్నొ పన్ని,

"మేల్మి బంగారమే యయ్య మే" మటంచుఁ 

బల్క, నమ్మెడి వారమే? వదరఁ బోకు! 

ఇచటి భద్రాచలాలయ, మిచటి జనులు,

వీరిపై ప్రేమ నీ కున్న వేగిరముగఁ

బోలవరమందుఁ బ్రాజెక్టు పూన్కి నాపి,

ముంపు నీయక, భద్రాద్రి కింపు నిడుము!

పోలవర మిట నిర్మింప మునుఁగు నంచు

నమ్ముఁ డెనుఁబది మూఁడు శాతమ్ము గ్రామ

ములును! మూఁడు లక్షల జనములు నుపాధి

లేక నిర్వాసితులు నయి, లేమిలోనఁ

గూర్పఁ బడుదురు! బాధలఁ గోరఁ దగునె?

ఇరువదియు నైదు వేల యెకరములు గల

యటవి నీటను మున్గును! నటులె రెండు

నూర్ల డెబ్బది యైదగు నూళ్ళు మునుఁగు!

పాపికొండలు, పేరంట్ల పల్లి మునిఁగి,

నీటి కడుపున నివసించు నిజము సుమ్ము!

నేఁడు పదునేను నడుగుల నీటిమట్ట,

మది నలువదియు మూఁడడ్గు లటు పయిఁ జను;

భారి వర్షమ్ము వచ్చిన వరద హెచ్చ

రికయె నల్వదెన్మిది గంటలకును ముందె

జారి యగుచుండ, ప్రాజెక్టుఁ గోరి యిచట

నిర్మితముఁ జేయు తదుపరి నెట్టు లుండు 

నో యటంచు నూహింపఁ గదోయి! యితర 

ప్రాంత సంబంధముల్ తెగు! వైద్య, విద్య, 

గిరిజనోపాధు లన్ని దుష్కరము లగును! 

గిరిజనులఁ గావ మైదాన పరిధులకును

దీసికొని పోవ నేజన్సి వాస చట్ట

మెటులు వారికి వర్తించు? నేది దారి?

సరియె పోనిండు! భరత దేశమ్మునందె

మిగులఁ బ్రాచీన జాతిగ నెగడునట్టి

కొండ రెడ్ల తెగయె యిటనుండి తొలఁగు!

ఎనిమిదౌ గ్రామములు మున్గు నిచట యనియుఁ

బల్కి, "యొడిశా"యె పెట్టె నభ్యంతరమ్ము!

ఇన్ని భద్రాద్రి గ్రామా లవెట్టి దుఃఖ

మందఁగాఁ గోరు దీవు? తమంత తాము

వెలికి వచ్చి, భద్రాద్రినిం గలుపఁగ వల 

దాంధ్రలోపల నంచును నార్తి తోడఁ 

బల్కుచుండి రీ ప్రజ! పోలవరము నాపి,

జరుగఁ బోవు విలయమునుం జరుగకుండఁ

గావఁగా నాంధ్రుఁడా నీకుఁ గరుణ లేదె?

కర్కశుండవే? యిఁక నైన గాలి మాట 

లాపి, భద్రాద్రి జోలికి రావలదయ! 

పోలవరము ప్రాజె క్టదియేల నీకు?

ఎన్నొ దుష్పరిణామాలు నున్న దదియ!

నీదు బాగుకోసమె యిట, నాదు బాగు

నాశ మొనరింతువే? యన్యాయమునకు

నడుము కట్టెదవే? దుర్జనుఁడవె నీవు?

మంచివాఁడవు నీవైన, మాన్యతఁ గన,

భద్రగిరి జోలికే రావ వలదు! కోర,

పోలవరము వర మిడదు! ముంపు నిడును!

ఇదే విషయమై మరిన్ని వివరాలకు:

దీనిపై క్లిక్ చేయండి

జై తెలంగాణ! జై జై తెలంగాణ!

_/\_ జయహో...కేసీఆర్...!

స్వాగత వృత్తము:

కామితానఁ దెలగాణను వేగన్

క్షేమమెంచి, యిట గెల్చియు రాష్ట్ర

మ్మోమఁగా మనసు పొంగినవాఁడా!

సౌమనస్యవర! స్వాగతమయ్యా!!

రథోద్ధత వృత్తము:

కల్వకుంట్ల తెలగాణ యోధుఁడా!

విల్వఁ బెంచితివి వేగ జేతవై!

నల్వవోలె నిను నవ్యగీతులన్

గొల్వఁ బూనితిమి, కొమ్ము కేసియార్!

తోటక వృత్తము:

ఘన మోదము నిచ్చితి! కాంక్షితమౌ

*త్రినగాంధ్రను గెల్చితి! తేజము హె

చ్చెను మోమున నిప్పుడు శీఘ్రగతిన్!

గొను మో ఘన వీరుఁడ, కూర్మినతుల్!!

ప్రియంవదా వృత్తము:

అరువదేండ్ల కల నందఁ జేయు నిన్

విరుల వర్షములఁ బ్రేమతోడుతన్

మురియఁ  జల్లుదుము! ముఖ్యమంత్రివై

వరమొసంగఁగను వందనమ్మిదే!

వనమయూర వృత్తము:

ఎంత ఘన వీరుఁడవు, హేమనగధీరా!

చింత వలదంచు మముఁ జీరి, తెలగాణన్

బంతమున గెల్చితివి! భారము తొలంగెన్!

సంతసము హెచ్చెనయ! స్వాగతముఁ గొమ్మా!

మాలినీ వృత్తము:

విమత కుటిల ధ్వస్తా! ప్రీతి పౌర ప్రశస్తా!

నమిత జన విశేషా! నవ్య నేతృ ప్రభూషా!

శ్రమ దమన విశిష్టా! శాంతి కాంతి ప్రహృష్టా!

విమల సుగుణమూర్తీ! విశ్వవిఖ్యాతకీర్తీ!

జై తెలంగాణ!   జై జై తెలంగాణ!

*త్రినగాంధ్ర పద రూపసాధన:

(త్రినగాంధ్రము = త్రిలింగాంధ్రము = త్రిలిఙ్గాన్ధ్రము > త్రిలింగాన్ధ్రము > తిలింగాన్దము > తెలంగాన్దము > తెలంగాణ్డము > తెలంగాణ్ణము > తెలంగాణము)

సర్వదా ఆలోచింపని పని చేయరాదు!

కం.
మన చేతను వోటున్నది,
మనకును మేలొదుగఁ జేయు మంచి మనిషికిన్
మన వోటును వేసినఁ జా
లును నిఁక నైదేండ్ల దాఁక రోచిస్సులెగా!

ఆ.వె.
వోటు వేయునపుడె చేటు కల్గింపని
నాయకులను మనమునందుఁ దెలిసి,
యైదు వత్సరములు హర్షమ్మునిచ్చెడి,
మంచివారినెన్నుమయ్య నీవు!

తే.గీ.
మనకు బంగారు భావి సంభవముఁ జేసి,
మన బ్రతుకులను బాగుగా మలచి, మనను
వెలుఁగఁ జేసెడి యత్యంత ప్రియతములగు
నేతలను నెన్నుచో మన గీత మారు!

కం.
వేమఱు నాలోచింపుఁడు,
నీమముతో నీదు వోటు నీ రాష్ట్రమ్మున్
సేమముగ నుంచు వారికె!
ధీమాతో వోటు వేయి ధీమంతులకే!

తే.గీ.
వోటు తప్పుడు వ్యక్తికి పోవు కతన,
నైదు వత్సరములు నీదు హక్కు లిడుము
లంబడుటె కాదు, రాష్ట్రంపు సంబరములు
నాశనమ్మగుఁ గావున నమ్మ కెపుడు!

మేం తెలబానులమైతే...మీరు తెలబాన్ధ్రులు కారా?

గతంలో తెలంగాణులను సీమాంధ్రులు అనేక రకాలుగా అవమానించారు...ఈసడించారు...హేళనచేశారు...వెక్కిరించారు...తిట్టారు...శాపనార్థాలుపెట్టారు! ఐనా మేం/మనం మౌనం వహించి, మా తెలంగాణ రాష్ట్రసాధనకై అహింసాయుతంగా పోరాటం చేశాం...సమ్మెలూ, ధర్నాలూ, రాస్తారోకోలూ చేశాం...చివరికి యువకులైన వీరులు వేయికి పైగా ఆత్మబలిదానాలు చేశారు...మా/మన నాయకుడు కేసీఆర్ తెలంగాణ సాధనకై నిరాహారదీక్షచేశారు...ఫలితంగా మేం మా తెలంగాణ రాష్ట్రాన్ని సాధించగలిగాం! కానీ...ఈ ఆంధ్రవాళ్ళు మమ్మల్ని/మనల్ని అన్న మాటలు గుర్తుకు తెచ్చుకుంటే మనస్సు అదోలా అవుతుంది! 

గతంలో (బుధ/గురు వారములు: 06-11-2013/07-11-2013) నేను సీమాంధ్రుల వెటకారాలకు సమాధానంగా రెండు టపాలు "నా తెలంగాణ కోటి రత్నాల వీణ"లో ప్రకటించాను...ఈ సమయంలో మళ్ళీ ఆ టపాలను ఒక్కటిగా ఇచ్చట ప్రచురిస్తున్నాను...పఠించండి!

మొదటి భాగము:

మా తెలంగాణ రాష్ట్రమ్ము మాకు నిడఁగఁ

గోరు వారలన్ వేర్పాటుఁ గోరు వార

లంచుఁ, దీవ్రవాదు లటంచు ననఁగ నేల?

మొదటి వేర్పాటు వాదులు గదయ మీరు!

నాఁడు మద్రాసు సఖ్యమ్ము నూడఁ బెఱికి,

వేఱు రాష్ట్రమ్ము నిడఁగానుఁ గోరి రెవరు?

తీవ్రముగ నుద్యమించిన దెవ రదెవరు?

మమ్ము తెలబాను లనఁగ మే మగుదు మెట్లు?

మొదటి తెలబాన్ధ్రులే మీరు! మురువకుఁ డయ!

ఒక్క ప్యూను జాబునకయి నిక్కి నీల్గి,

యాగి చేసితి రయ్య మీ యాంధ్రు లపుడు!

సభలు చేసియు, నిందించి, జాలి లేక,

యాంధ్ర రాష్ట్ర మేర్పాటె ధ్యేయ మ్మటంచు,

నుద్యమమ్ము నడిపినది యోర్వలేని

యాంధ్రులరు కాదె? మదరాసు నాంధ్ర దనుచుఁ

గోరి యుద్యమించిన యట్టి వార లెవరు?

మమ్ముఁ దెలబాను లందురే? మమ్ము దోచి,

యెఱుఁగ నట్టున్న తెలబాన్ధ్రు లీరు కారె?

దొంగయే "దొంగ..దొంగరో..దొంగ" యనుచుఁ

బరుగుఁ దీయంగ...దొంగయే దొరగ నగునె?

యిచటి వెన్నియో దోచియు, నెఱుఁగ నట్లు,

మమ్ముఁ దెలబాను లనఁగానె మాయునె యవి?

మీరు చేసిన శృంగారమే యదౌనె?

మేము చేసిన వ్యభిచారమే యిదౌనె?

నోరు మూయుఁడు! నవ్వియుఁ బోరె? మీర

లింక వగల మాటలు మానుఁ డిట్టి తఱిని!!

రెండవ భాగము:

మేము విజయమ్మ నడ్డిన మెచ్చుకొనక,

“తీవ్రవాదు లీ తెలబాన్లు! ద్వేషమునను

నడ్డుచుండిరి! రాజ్యాంగ హక్కు నిటులఁ

ద్రోచి రయ వీరు! నేత నాక్రోశమునను

రా వలదటంచుఁ బల్కంగఁ, బ్రజల నెట్లు

తిప్పలను బెట్టెదరొ”యంచుఁ దెలివి తప్పి,

మాటలాడంగ సరియౌనె? మాకు నామె

యిచ్చిన వరాల మాటల వెక్క డయ్య?

“ఓ తెలంగాణ ప్రజలార! నీతి తప్పి

నేను నడువను! తెలగాణ నిచ్చునట్టి

దాన నేఁ గాను! కేంద్రమ్మె దాని నిచ్చు!

మీ తెలంగాణ సెంటిమెంట్ మేము గౌర

వింతు మయ్య! నా భర్త యా వేళ మీకు

నిడఁ దెలంగాణమును బాగనెంచి, ఢిల్లి

హై కమాండుకుఁ దెలిపెను! మాకు మీర

లోటు వేయఁ గృతజ్ఞతఁ జాటుకొందు!”

మనుచు మాట్లాడి, నేఁ డిట్లు మాట తప్పి,

“జై సమైక్యాంధ్ర!” యనుచును సాఁగి వచ్చి,

మా తెలంగాణలో “సానుభూతి యాత్ర”

పేరఁ “దెలగాణ వ్యతిరేకి”, తీరు మార్చి,

యడుగు పెట్టంగ నడ్డరే యామె నపుడు?

మా మనోభావమ్ముల మాత్ర మామె

గాయ పఱుపంగ వచ్చునే? కనుక మేము

నడ్డుకొంటిమి నిరసన నందఁ జేయ!

మాట తప్పిన వారికి మంగళార

తుల నొసంగియు స్వాగతింతురె జనులిట?

“మా స్థలమ్ముకు రావద్దు, మాను”మనుచు

నిరసనముఁ దెల్ప; వచ్చిన నేమి కతము?

మమ్ము పరిహసించుటె కాదె మఱల మఱల?

“నిరసనముఁ దెల్పరా” దన, నేమి యిదియె

బ్రిటిషు పాలనమే? లేక, వేఱె యౌనె?

మా మనోభావముల గాయ మందఁజేయ,

మా నిరసనఁ దెల్పెడి హక్కు మాకు లేదె?

నాఁడు “సైమను గో బ్యా” కనంచు నాంధ్రు

లందఱును నడ్డరే తీవ్రమైన కృతుల!

నేల నడ్డిరి సైమను నిట్టి జనులు?

అట “సమైక్యాంధ్ర” పేర మీ రడ్డగించి

యున్న సీమాంధ్ర నేతల కెన్ని యడ్లు

పెట్టితిరొ మీరు మఱచిరే విలువ తప్పి?

బొత్స బంధువర్గము పైన బూటకంపు

దాడి చేసి, లూటి యొనర్ప ధర్మమౌనె?

హర్ష కుమారుఁ డేమియు ననియె నయ్య?

యతని పైదాడి సేయంగ నగునె నీతి?

మీది తీవ్రవాదము కాక, మాది యౌనె?

సరియె పోనిండు! మొన్న శ్రీశైల భక్తు

లనఁగ, మా హనుమంత రావును ననంగ,

నట వసించునట్టి తెలగాణ జను లనఁగ

నెందు కడ్డితిరో చెప్పు! నీతి మాలి,

నిండు చూలును వైద్యమ్ము నీఁకఁ దఱిమి

కొట్టినట్టి మిమ్మేమందు రట్టి తఱిని?

మా తెలంగాణకును జెందు మహిళ పైన

పేడఁ గొట్టుట నేమండ్రు వెఱ్ఱి యనక?

యిట్లు దాడి చేసిన కత మేమొ చెపుడు!

నిరసనము కాదె? మేమును నిరసనమును

దెల్పినారము! మమ్మేలఁ దిట్టుదు రయ?

మే మిట వసించు సీమాంధ్రు నేమి యైన

నంటిమే? మేమె బాధల నంది, వేయి

యాత్మ బలిదానముల నిడి యడలితి మయ!

మేము తీవ్రవాదులమైన, మీర లెవరు?

మమ్ము తెలబాను లందురే? మమ్మనంగ,

మీరు తెలబాన్ధ్రులరు కారె? మిత హితులరె?

మీరు చేసిన శృంగారమే యదౌనె?

మేము చేసిన వ్యభిచారమే యిదౌనె?

నోరు మూయుఁడు! నవ్వియుఁ బోరె? మీర

లింక వగల మాటలు మానుఁ డిట్టి తఱిని!

***     ***     ***     ***     ***

(మొదటి భాగం...లింకు చూడదలచినవారు...దీనిపై క్లిక్ చేయండి)

(రెండవ భాగము చూడదలచినవారు...దీనిపై క్లిక్ చేయండి)

జై తెలంగాణ!    జై జై తెలంగాణ!

ఆలోచింపని పని ప్రమాదమే పంచుతుంది!

కం.
మన చేతను వోటున్నది,
మనకును మేలొదుగఁ జేయు మంచి మనిషికిన్
మన వోటును వేసినఁ జా
లును నిఁక నైదేండ్ల దాఁక రోచిస్సులెగా!

ఆ.వె.
వోటు వేయునపుడె చేటు కల్గింపని
నాయకులను మనమునందుఁ దెలిసి,
యైదు వత్సరములు హర్షమ్మునిచ్చెడి,
మంచివారినెన్నుమయ్య నీవు!

తే.గీ.
మనకు బంగారు తెలగాణమందఁజేసి,
మన బ్రతుకులను బాగుగా మలచి, భవిత
వెలుఁగఁ జేసెడి యత్యంత ప్రియతముఁడగు
రాష్ట్రదాతకు వోటు వరాలుఁ గుఱియు!

కం.
వేమఱు నాలోచింపుఁడు,
నీమముతో నీదు వోటు నీ రాష్ట్రమ్మున్
సేమముగ నుంచు వారికె!
సీమాంధ్రుల కిడెడి వోటు చిక్కులఁ దెచ్చున్!

తే.గీ.
వోటు తప్పుడు వ్యక్తికి పోవు కతన,
నైదు వత్సరములు నీదు హక్కు లిడుము
లంబడుటె కాదు, రాష్ట్రంపు సంబరములు
నాశనమ్మగుఁ గావున నమ్మ కెపుడు!

జై తెలంగాణ!    జై జై తెలంగాణ!