స్థానికేతరులకు కొలువులా?

సింగరేణిలోని ఉన్నతాధికారులు నిబంధనలకు విరుద్ధంగా వ్యవహరిస్తున్నారు. ఆరున్నర దశాబ్దాలుగా అన్ని విధాలుగా నష్టపోయిన తెలంగాణలోని నిరుద్యోగులకు చిన్నస్థాయి సర్కారీ కొలువు వచ్చినా చాలని భావిస్తున్నారు. ఈ నేపథ్యంలో సింగరేణిలో అవసరమైన 20 ఎన్విరాన్‌మెంట్ ఇంజినీర్ పోస్టులను పక్కరాష్ట్రవాసులతో నింపేందుకు ఉన్నతాధికారులు ప్రయత్నాలు చేయడం వివాదాస్పదమవుతోంది. జార్ఖండ్‌లోని ధన్‌బాద్‌లో ఉన్న ఇండియన్ స్కూల్ ఆఫ్ మైనింగ్ విద్యార్థులను ఇంటర్వ్యూ లు చేసేందుకు సింగరేణి అధికారుల బృందం వెళ్తున్నట్లు సమాచారం. ప్రస్తుతం రాష్ట్రంలో ఎన్నికల కోడ్ అమల్లో ఉన్నందున, 16న(శుక్రవారం) అక్కడికి వెళ్లేలా పకడ్బందీ ప్రణాళిక రూపొందించుకున్నారు. ధన్‌బాద్‌కే ఎందుకు వెళ్తున్నారంటే, ప్రస్తుతం సింగరేణి ఉన్నతాధికారి ఒకరు ఉత్తరాది వాస్తవ్యుడు కావడం తో అక్కడ నిరుద్యోగులకు ఉపాధి కల్పించేందుకు ప్రేమ ప్రదర్శిస్తున్నారని ఆరోపణలున్నాయి.

తెలంగాణలో ఎంతో మంది అర్హులైన విద్యార్థులు ఉన్నప్పటికీ ధన్‌బాద్‌కు వెళ్లాలనుకోవడంపై కార్మిక సంఘాలు ఆగ్రహం వ్యక్తం చేస్తున్నాయి. అధికారుల ప్రయత్నాలను అడ్డుకుంటామని టీబీజీకేఎస్ నేతలు తేల్చిచెబుతున్నారు. రాబోయే ప్రభుత్వం దృష్టికి తీసుకెళ్లి ఈ ప్రయత్నాలను అడ్డుకుంటామని టీబీజీకేఎస్ అధ్యక్షుడు కనకరాజు, జేఏసీ నేత శంకర్‌నాయక్ చెప్పారు.అధికారుల తీరుపై సింగరేణి సీఎండీ, గవర్నర్, చీఫ్ సెక్రటరీకి ఫ్యాక్స్ ద్వారా ఫిర్యాదు చేశారు. అధికారుల ప్రయత్నాలకు చెక్ పెడతామని, స్థానికేతరులకు ఉద్యోగాలు ఇస్తే ఒప్పుకునే ప్రసక్తే లేదని టీబీజీకేఎస్ ప్రధాన కార్యదర్శి మిర్యాల రాజిరెడ్డి తేల్చిచెప్పారు. దీనిపై అధికారులను ప్రశ్నిస్తే, ఇంటర్వ్యూ మాత్రమే చేస్తామని.. నియమించబోమని చెప్పారని వెల్లడించారు. కొత్తగా సిబ్బంది అవసరమైతే సింగరేణిలో ఉన్న అధికారులనే సర్దుబాటు చేయాలి, లేకుంటే స్థానికులకే అవకాశం కల్పించాలన్నారు. 610 జీవో అమలుచేయాల్సిన సమయంలో ఇలాంటి ప్రయత్నాలు సరికావని హెచ్చరించారు.

ఈ అంశంలో సీమాంధ్రుల కుట్ర దాగివుండవచ్చు. ఇలాంటి నక్కజిత్తులు వాళ్ళకు మాత్రమే వుంటాయి. వీళ్ళ ప్రోత్సాహం ఇందులో తప్పకుండా వుండివుంటుందని పలువురు అనుమానం వ్యక్తం చేస్తున్నారు. ఇంటర్వూ మాత్రమే చేస్తామనడంలో ఉద్దేశం ఏమిటి? ఈ ఇంటర్వూలు ఉద్యోగాలివ్వడానికి కాకుంటే మరెందుకు చేస్తున్నట్టు? ఇందులో మోసం దాగివున్నది...అవసరమైతే దీన్ని ఉద్యమించడంద్వారా ఛేదిస్తాం అని హెచ్చరించారు.

(నమస్తే తెలంగాణ దినపత్రిక సౌజన్యంతో...)

జై తెలంగాణ! జై జై తెలంగాణ!