విభజనమును జరుగకుండ
చేయుదునని ప్రతినబూని
ప్రగల్భాలు పలికినట్టి
కిరణ్ రెడ్డి కతలు కనుడు!
బెర్లిన్ గోడను పగులగ
గొట్టినట్లు, విభజనమను
గోడపగులగొట్టెదనని
ప్రగల్భాలు పలుకసాగె!
ప్రపంచ చరితము తెలియని
నల్లారియె అజ్ఞతతో
పలికిన మాటలు ఇవియని
పరిశీలించిన దెలియును!
తూర్పు జర్మనియె సోవియట్
పాలన నుండియు విముక్తి
నందినతరి ఆ గోడను
పగులగొట్టిరయ్య జనులు!
జర్మనీని విభజించియు
సోవియట్టు గోడకట్ట,
స్వతంత్రమ్మునందినట్టి
తూర్పు జర్మనియె చీల్చెను!
సామ్యవాద సిద్ధాంతము
మాటున సామ్రాజ్యవాద
కుట్రల ఛేదించి యెన్నొ
దేశాలే విడిపోయెను!
ఒక్కటియౌ జర్మనియే
తూర్పు పశ్చిమమ్ములుగా
విడదీసిన సోవియట్టు
కుట్ర గూల్చి ఒకటైనవి!
ఈ మెలికయె తెలియనట్టి
కిరణ్ రెడ్డి పిట్టకతను
విన్నవారు నవ్వెదరయ!
అజ్ఞానిగ తలిచెదరయ!!
తెలగాణకు సీమాంధ్రకు
ఇట్టి పోలికే లేదయ!
మోసముతో తెలగాణను
సీమాంధ్రతొ కలిపినారు!!
ఒక్కటియగు జర్మనీని
రెండుగ విడదీసినారు!
విడిగనున్న తెలగాణను
బలిమితోడ కలిపినారు!!
రెండింటికి పోలికయే
ఏమాత్రము లేకున్నను
ఉన్నదనియు పలుకునట్టి
కిరణ్ రెడ్డి అజ్ఞానియె!
తెలగాణకు సీమాంధ్రకు
నడుమ గోడ కట్టిరెవరు?
విడివిడిగా నున్నవాటి
నడుమ గోడ ఎక్కడిదయ?
మోసముతో తెలగాణను
సీమాంధ్రతొ కలిపి వారు
దోపిడియను చుట్టుగోడ
కట్టగ, తెలగాణ చీల్చె!
దోపిడీలు చెల్లవయా,
మోసమ్ములు చెల్లవయా,
సమైక్యమను ముసుగుతోడి
కుతంత్రాలు చెల్లవయా!
అరువదేండ్ల దోపిడీకి
మంగళ గీతిక పాడగ,
సమైక్యమను పాచిపండ్ల
దాసరి పాటయె యేలయ?
వేరుపరచబడినవారు
జర్మనీని తన్నుతన్ని,
ఒక్కటిగా మారి, స్వేచ్ఛ
గీతికనే పాడినారు!
సీమాంధ్రుల కబంధ హ
స్తమ్ములలో జిక్కినట్టి
తెలగాణము స్వేచ్ఛగొనియు
మంగళగీతిక పాడెను!
ఈ రెంటికి పోలికయే
లేకున్నను అజ్ఞానపు
కూతలతో మోసగించు
కిరణ్ రెడ్డి స్వార్థపరుడె!
"జై సమైక్య ఆంధ్ర" అనెడి
పార్టిపెట్టి ప్రజల చెవిని
పువ్వుపెట్టగాను దలచి
అతడాడెడి నాటకమిది!
ప్రజల నమాయకుల జేసి,
ఓట్లు సీట్లు కొల్లగొట్టి,
తన తమ్ముని మూట నింపు
నూతన వ్యాపారమ్మిది!
తూర్పు జర్మనీయె మరల
సోవియటున ఎట్లు కలియు?
స్వేచ్ఛగొనిన తెలంగాణ
సీమాంధ్రను ఎట్లు కలియు?
సీమాంధ్రుల పెత్తనమ్ము
సహియింపని తెలంగాణ
సమైక్యాంధ్రమనగానే
సీమాంధ్రను ఎట్లు కలియు?
దోచుకున్న వారలనే
నమ్మి యెట్లు దరిజేరును?
పగటికలలు కనినయట్టి
కిరణ్ రెడ్డి అజ్ఞానియె!
గౌరవప్రద తెలంగాణ,
స్వతంత్రయౌ తెలంగాణ,
బంగారపు తెలంగాణ
సీమ గలియు మాట కల్ల!!
జై తెలంగాణ! జై జై తెలంగాణ!
కామెంట్‌లు లేవు:
కామెంట్‌ను పోస్ట్ చేయండి