(1)
ధన్యు లమర వీరుల ఘన త్యాగ జనిత
నవ్య తెలగాణ రాష్ట్ర మీ నాణ్య ఫలము!
శశ్వ దంచిత విభవ విశాల హ్రదము
నా తెలంగాణ కోటి రత్నాల వీణ!
(2)
ఘనత నాంధ్ర ప్రదేశానఁ గలుపఁ బడియు,
మోసగింపఁగఁబడి, యెన్నొ యాసలఁ జెడి,
యణఁగి పోయియు, నెగసిన యాద్య వరము
నా తెలంగాణ కోటి రత్నాల వీణ!
(3)
మన తెలంగాణ జే.ఏ.సి. ఘనత ఫలిత,
మీ తెలంగాణ రాష్ట్ర సమితి విశేష
కృషియు, బీ.జే.పి. వంటి నిశ్శ్రేణు లమర;
నిలిచి యెదిగిన దీప్త సుస్నిగ్ధ యశము
నా తెలంగాణ కోటి రత్నాల వీణ!
(4)
అఱువ దేఁడుల త్యాగాల కాలవాల
మగుచుఁ జిర సుప్రతీక్షితమైన కృతము!
కాంగ్రెసున సోనియమ్మకు కలల పంట
నా తెలంగాణ కోటి రత్నాల వీణ!
(5)
సకల జనుల యుద్యమ సమాశ్రయమునందు
రూపు దిద్దిన తెలగాణ దీప మిపుడు
వెలుఁగు నింపుచు మన బ్రతుకులను దిద్దు
నా తెలంగాణ కోటి రత్నాల వీణ!
జై తెలంగాణ! జై జై తెలంగాణ!
కామెంట్‌లు లేవు:
కామెంట్‌ను పోస్ట్ చేయండి