ఇదంతా మా ఔదార్యమే.. మీ హక్కు కాదు..!!

పాపమని పచ్చి పులుసు వోత్తె నేతిబొట్టు లేదని లేసిలేసి ఉరికిందట అనే  సామెత తెలంగాణలో ఉన్నది. అరవై ఏళ్లుగా ఆంధ్రులు (ఆంధ్రపాలకులు, ఆంధ్ర అక్రమార్కులు) ప్రవర్తిస్తున్న తీరు చూస్తే ఈ సామెతలో ఎంత వాస్తవముందో అర్థమవుతుంది. తెలంగాణ రాష్ర్టం ఏర్ప డిన తర్వాత కూడా మొగన్ని గొట్టి మొరమొర అన్నట్టే ఉంది వాళ్ల వైఖరి. అంటే భర్త భార్యను కొట్టొచ్చు కానీ, భార్య భర్తను కొట్టొద్దని అర్థం కాదు. ఎవరూ ఎవర్నీ కొట్టకూడదని. ఆడ అయినా మగ అయినా తానే ఇతరులను కొట్టి, తననే కొట్టారని ఒర్రడం లాంటిదే. ఇటీవల ఆంధ్రులు తెలంగాణ పట్ల చేస్తున్నదదే. ఓటుకు నోటు వ్యవహారంలో ఆంధ్ర రాజకీయులు ఇటేటు రమ్మంటే ఇళ్లంతా నాదే అన్నట్టుంది. 

గత అరవై ఏళ్లుగా తెలంగాణపై ఆంధ్ర రాజకీయులు, పెట్టుబడిదారులు సాగిస్తున్న దోపిడీని, ఆధిపత్యాన్ని సజీవంగా ఉంచడానికి చేస్తున్న ప్రయత్నమే హైదరాబాద్‌ను గవర్నర్ పాలన కింద ఉంచమనడం. సుమారు ఐదువందల ఏళ్లుగా హైదరాబాద్ తెలంగాణ ప్రాంతానికి రాజధాని. హైదరాబాద్‌లోని ప్రతి భవన నిర్మాణంలో, నగర నిర్మాణంలో తెలంగాణ ప్రజల రక్తమాంసాలతో పాటు, చెమట ధారలున్నాయి. ఆంధ్రవాళ్ళు స్వాతంత్య్ర పూర్వం నాటికే భారతదేశంలో ఐదవ మహా నగరంగా ఉన్న భాగ్యనగరంపై కన్నేశారు. హైదరాబాద్ రాష్ర్టాన్ని ఆంధ్రతో బలవంతంగా విలీనం చేశారు. నాటినుంచి వలస పాలకులు తెలంగాణను అరవై ఏళ్ల పాటు అన్నిరంగాల్లో ధ్వంసం చేశారు. ఇది చాలదన్నట్లుగా ఉమ్మడి రాజధాని పేరుతో రాష్ట్ర విభజన తర్వాత కూడా ఆ దోపిడీ కొనసాగించాలని ఆరాటపడుతున్నారు. దానికి నాయకత్వం వహించేది ఏపీ సీఎం చంద్రబాబు.

సెక్షన్ 8 పేరుతో హైదరాబాద్ నగర శాంతిభద్రతల బాధ్యతను గవర్నర్‌కు అప్పగించాలని నానా యాగీ చేయడం తెలంగాణ రాష్ర్ట సార్వభౌమాధికారాన్ని ప్రశ్నించడమే. విభజన చట్టంలో సెక్షన్-8 ఎందుకు పెట్టాల్సి వచ్చింది? అందులో ఏముందనే విషయాన్ని పరిశీలిస్తే హైదరాబాద్‌లో శాంతిభద్రతల పరిస్థితి రాష్ట్ర ప్రభుత్వం అదుపుచేసే స్థితిలో లేనప్పుడు ఆ బాధ్యతలను గవర్నర్‌కు అప్పగించాల్సి ఉంటుంది. గత సంవత్సరకాలంగా ఎవరి శాంతిభద్రతలకు భంగం ఏర్పడింది? ఏ ఒక్క సంఘటన జరిగిందా? ఇక్కడ ఆంధ్ర ప్రజలు స్వేచ్ఛగా జీవిస్తున్నారు. అలాంటప్పుడు సెక్షన్-8 అవసరం ఎక్కడున్నది? ఆంధ్రులకు గాని, ఇతరులకు గాని ఎలాంటి నష్టం జరగకపోగా 10వ షెడ్యూల్ కింద ఉన్న సంస్థల్లో ఇప్పటికి ఆంధ్ర పెత్తనమే సాగుతుంది. 

విభజన సూత్రాలను ఉల్లంఘించి తెలంగాణ ప్రజలకు అన్యాయం చేయటానికి శత విధాలుగా ప్రయత్నిస్తున్నారు. అయినా తెలంగాణ ప్రజలు, నాయకులు ఓపికతో వేచిచూస్తున్నారు. ఆంధ్ర, రాయలసీమ, జిల్లాల్లో తెలంగాణ ప్రజలు స్వల్ప సంఖ్యలో ఉన్నా వాళ్లది అక్కడ ఉండలేని పరిస్థితి. హైదరాబాద్‌లో, ఇతర తెలంగాణ జిల్లాలో వేల సంఖ్యలో ఉన్న కోస్తాంధ్ర ఉద్యోగులు పెత్తనం కొనసాగిస్తుంటే వాళ్ల శాంతిభద్రతలకు ఏం భంగం కలిగినట్లు? ఓటుకు నోటు వ్యవహారాన్ని పక్కదోవ పట్టించేందుకు సెక్షన్-8ని తెరపైకి తెస్తున్నారనడంలో అనుమానం లేదు. అయినంత మాత్రాన చేసిన తప్పు తప్పు కాకుండా పోతుందా? పొరుగు రాష్ట్ర ముఖ్యమంత్రి అయినంతమాత్రాన ఏం నేరం చేసినా, ఎంతపెద్ద తప్పు చేసినా చూస్తూ కూర్చోవాలా? ఉమ్మడి తాత్కాలిక రాజధానిలో ఉండనిచ్చేది నేరాలు చేయడానికా? హుందాగా విచారణకు అంగీకరించి నిర్దోషిత్వాన్ని నిరూపించుకోవాలె కానీ దృష్టి మరల్చడానికి ప్రయత్నిస్తే అది ఏ పాటి రాజనీతి అవుతుంది? కుటిల నీతి తప్ప.

ఆంధ్రప్రదేశ్ రాజధాని నిర్మాణం పూర్తయ్యేంతవరకు హైదరాబాద్‌ను ముఖ్యపట్టణంగా వాడుకోవచ్చుని తెలంగాణ ప్రజలు, నాయకులు అంగీకరించడం తప్పా? హైదరాబాద్ ఉమ్మడి రాజధాని అంటే హైదరాబాద్‌పై ఏ హక్కులు ఆంధ్రప్రదేశ్‌కు ఉన్నట్లు కాదు. ఆంధ్రలో అన్ని వసతులున్న మహా నగరం లేదు కాబట్టి హైదరాబాద్‌లోని భవనాలను ఉపయోగించుకొని పాలన చేసుకోవాలని అంగీకరించినట్టు. ఇది తెలంగాణ ప్రజల, నాయకుల మంచితనానికి నిదర్శనం. ఇందుకు ఫలితంగా హైదరాబాద్‌పై మాకు హక్కు ఉందనడం ఇటేటు రమ్మంటే ఇల్లంతా ఆక్రమించుకోవడానికి ప్రయత్నం చేస్తున్నట్లే కదా? ఈ పాపానికి మేం ఏం చేసినా చెల్లుతుందని సీమాంధ్ర నాయకులు భావిస్తే అది చట్ట ధిక్కారమే అవుతుంది. ఎన్ని కుట్రలు చేసినా, తెలంగాణ ప్రభుత్వాన్ని కూలదోయడానికి ప్రయత్నించినా మా మీద ఏ చర్యలూ తీసుకోవద్దని ఎదురుదాడి పేరుమీద రాజకీయాలు చేయడం మానుకొని, తప్పును ఒప్పుకొని లేదా నిర్దోషిత్వాన్ని నిరూపించుకోవడమో చేయాలి. అంతేకానీ ఎదురుదాడి పేరుతో దారి, దృష్టి మళ్ళింపు రాజకీయాలు చేయడం సరైంది కాదు. నాలుగు వందల ఏళ్ల పైకాలం నుంచి, ఇప్పటికీ, ఎప్పటికీ హైదరాబాద్ తెలంగాణ ప్రజలదే. దీనిపై హక్కులన్నీ తెలంగాణ ప్రభుత్వానివే. ఓటుకు కోట్లు లాంటి అనైతిక చర్యలు శాంతిభద్రతలు ఎవరి చేతిలో ఉన్నా నేరపూరితమైనవే. నేరస్థులు శిక్ష అనుభవించాల్సిందే. ఇప్పటికైనా హైదరాబాద్‌పై పెత్తనం చేయాలనే దురాశను వదులుకొని సీమాంధ్ర రాజకీయాలను తమ పదమూడు జిల్లాలకు పరిమితం చేసుకుంటే హైదరాబాద్‌లో ఉన్న తెలుగువాళ్లు అన్నదమ్ముల్లా కలిసే ఉంటారు.

అవును.. హైదరాబాద్ తెలంగాణ ప్రజల జాగీరే. కులీ కుతుబ్ షా, భాగమతిల ప్రేమకు చిహ్నంగా తెలంగాణ ప్రజల చెమటధారలతో నిర్మింపబడిన నాలుగు వందల ఏళ్ల పైచిలుకు చరిత్ర ఉన్న చారిత్రక నగరం. మీకు రాజధాని లేదు కాబట్టి తాతాలికంగా ఇక్కడుండి పాలించుకొండి అన్నంత మాత్రాన మరో పదేళ్లు దోచుకోమని కాదు. ఎంత త్వరగా వీలయితే అంత త్వరగా రాజధాని నిర్మాణం పూర్తి చేసుకొని వెళ్ళమని. ఇంత కాలంగా తెలంగాణ ఆత్మగౌరవం దెబ్బతినేలా ప్రవర్తించి పాలించిన ఆంధ్రులు తామేం చేసినా ఊరుకోవాలని, లేకుంటే తమ ఆత్మగౌరవం దెబ్బతినేలా ప్రవర్తిస్తున్నారనడం హాస్యాస్పదం. చట్టం తన పని తాను చేసుకుపోతుంది. పొరుగు రాష్ట్ర ముఖ్యమంత్రి అయినంతమాత్రాన నేరం చేస్తే చర్యలు తీసుకొనే హక్కు, అధికారం తెలంగాణ రాష్ట్ర ప్రభుత్వానికి ఉండదా? అరవై ఏళ్లు తెలంగాణ ప్రజల ఆత్మగౌరవాన్ని హరించిన సీమాంధ్ర నాయకులు ఆత్మగౌరవం గురించి మాట్లాడటం నవ్వులాటగానే ఉన్నది. రాజధాని తయారయ్యేవరకు తగాదాలతో ఇక్కడ ఉండాల్సిన అవసరం లేదు. అమరావతి దేవేంద్ర నగరం సకల సౌభాగ్యాలను, సౌకర్యాలనిచ్చే వైభవోపేత నగరం నిర్మాణం కావాలంటే దేవతల కాలమానం ప్రకారం మనుషులకు వందల సంవత్సరాలు పడుతుంది. 

ఎందుకంటే మనుషులకు పదేళ్ల కాలం దేవతలకు లిప్తకాలం కూడా కాదు. గిల్లికజ్జాలతో లిప్తకాలం కూడా వేచి చూస్తూ లడాయితో కాలయాపన చేసే ఓపిక తీరిక, తెలంగాణ వాళ్ళకు లేదు. ఎందుకంటే అరవై ఏళ్ల పోరాట ఫలితంగా వచ్చిన తెలంగాణను బంగారు తెలంగాణగా తీర్చిదిద్దుకునే పనిలో ఈ రాష్ట్ర ప్రజలు ఉన్నారు. అనవసర తగాదాలు పెట్టుకునే స్థితిలో తెలంగాణ ప్రజలు లేరు.

సెక్షన్-10 షెడ్యూల్‌ను అడ్డుపెట్టుకొని సీమాంధ్ర ఉద్యోగులు హైదరాబాద్‌లోనే పర్మినెంటుగా స్థిరపడటానికి కుట్రలు చేయడం సరైంది కాదు. దీంతో తెలంగాణ ఉద్యోగావకాశాలు దెబ్బతిని తెలంగాణ రాష్ర్టాన్ని సాధించిన ఫలితం భంగమవుతుంది. అలాగే సెక్షన్-8 పేరుతో నేరాలు చేసి తప్పించుకోవాలని చూడటం కుట్రలో భాగమే. అందుకోసం సీమాంధ్ర నాయకులు తెలంగాణపై కుట్రలు మానుకొని తెలంగాణ జాగీరైన హైదరాబాద్ గురించి కాక తమ దేవేంద్రనగరం అయిన అమరావతి నిర్మాణం గురించి పూర్తి సమయాన్ని కేటాయిస్తే సీమాంధ్ర ప్రజలకు మేలు జరుగుతుంది. తెలంగాణ నాయకుల్లా విభజన చట్టాన్ని గౌరవించి చట్టం తన పనిని తాను చేసుకునేందుకు సహకరించడం తప్ప సీమాంధ్ర నాయకులకు మరో మార్గం లేదు. అలా చేయకుంటే చట్టం ఎలాగూ తనపని తాను చేసుకుంటూ పోతుంది. కానీ సీమాంధ్ర నాయకులను చరిత్ర క్షమించదు.

ఆంధ్రప్రదేశ్ రాజధాని నిర్మాణం పూర్తయ్యేంతవరకు హైదరాబాద్‌ను ముఖ్య పట్టణంగా వాడుకోవచ్చుని తెలంగాణ ప్రజలు, నాయకులు అంగీకరించడం తప్పా? హైదరాబాద్ ఉమ్మడి రాజధాని అంటే హైదరాబాద్‌పై ఏ హక్కులు ఆంధ్రప్రదేశ్‌కు ఉన్నట్లు కాదు. ఆంధ్రలో అన్ని వసతులున్న మహానగరం లేదు కాబట్టి హైదరాబాద్‌లోని భవనాలను ఉపయోగించుకొని పాలన చేసుకోవాలని అంగీకరించినట్టు. ఇది తెలంగాణ ప్రజల, నాయకుల మంచితనానికి నిదర్శనం.

వ్యాసరచయిత: కాలువ మల్లయ్య

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!