ఆంధ్రోళ్లు అనొద్దు.. ఆంధ్రా ఎంపీలకు పౌరుషం లేదా?

ప్రశ్నిస్తానన్న పవన్ కళ్యాణ్ ఏమైపోయాడు... అని జనం నిలదీసే సరికి ఎట్టకేలకు జనసేన అధినేత, సినీ హీరో పవన్ కళ్యాణ్ మీడియా ముందుకు వచ్చారు. ముందుగా సీఎం కేసీఆర్‌ను ఒక మాటలో పొగిడారు. యాదగిరి నరసింహ స్వామి ఆలయం డిజైన్ చేయడానికి ఆంధ్రా వ్యక్తిని నియమించి తెలుగు జాతి ఐకమత్యానికి కృషి చేస్తున్నందుకు కేసీఆర్‌కు పవన్ ధన్యవాదాలు తెలిపారు.

ఆ తరువాత ఓటుకు నోటు కేసుకు తనకు సంబంధం లేదన్నారు. ఆ పని కోర్టులు పోలీసులు చూసుకుంటాయన్నారు. కాసేపు ఆంధ్రా ఎంపీలను తిట్టారు. ఏపీ ప్రత్యేక హోదాపై ఎంపీలు ఏం చేస్తున్నారని ప్రశ్నించారు. ఆయన ప్రసంగంలో ఈ ఒక్క ప్రశ్న మాత్రం కరెక్టుగా అడిగారు. కానీ అందులో చంద్రబాబు, వెంకయ్య నాయుడు, మురళీమోహన్‌లను వదిలేసి మిగతావారి పేర్లు చెప్పారు. ఆంధ్రా పాంతం నుంచి ఎన్నికైన ఎంపీలంతా పార్లమెంటులో ఏం చేస్తున్నారని, గోడలను, స్తంభాలను చూస్తూ మైమరిచి పోతున్నారా? అంటూ నిలదీశారు. 

తెలంగాణ ఎంపీలను చూసి నేర్చుకోండి, వారు స్వరాష్ట్రం కోసం ఎలా పోరాడారో! ఏపీ ప్రత్యేక హోదాపై కేంద్రంతో కొట్లాడండని పవన్...ఏపీ ఎంపీలకు సూచించారు. ఆయన ప్రసంగం ఆథ్యంతం ఆంధ్రా రాష్ట్రం, ఆంధ్రా ఎంపీలు అంటూ మాట్లాడిన పవన్ తెలంగాణ వారు మాత్రం ఆంధ్రా ప్రజలను ఆంధ్రోళ్లు అనొద్దని చెప్పారు. చంద్రబాబును సైతం ఆంధ్ర సీఎం అనొద్దట. ఈ మాట అన్నపుడు మీడియా ప్రతినిధులకు అర్థం కాలేదు. కోపమొస్తే తిట్టేటపుడు ఆంధ్రా సీఎం అనో ఆంధ్ర చంద్రబాబు అనో కాకుండా డైరెక్టుగా చంద్రబాబు అని తిట్టండని సూచించారు. 

మొత్తం మీద వెనకది ముందుకు, ముందుది వెనకు మాట్లాడుతూ ఒకదానితో ఒకటి సంబంధం లేకుండా మాట్లాడి అందరినీ కాస్త ఇరిటేట్ చేశాడు. ఆయన ప్రసంగంలో ఒక్కటి మాత్రం స్ఫష్టంగా చెప్పాడు. తెలంగాణ ఎంపీలను ఆదర్శంగా తీసుకుని ఏపీ ప్రత్యేక హోదాకు పోరాటం చేయండని ఆంధ్రా ఎంపీలను, ఇతర రాజకీయ పార్టీ నేతలను డిమాండ్ చేశారు. తాను మాత్రం పూర్తి రాజకీయ నాయకుడిగా మారిన తర్వాత ప్రత్యేక హోదాకోసం పోరాటంలో కలసి వస్తానని చెప్పారు.

సెక్షన్-8కు తాను వ్యతిరేకమని పవన్ స్పష్టం చేశారు. సెక్షన్-8ను అమలు చేసి తెలంగాణ రాష్ట్రం ఏర్పాటుతో తెలంగాణ ప్రజల్లో ఏర్పడిన ఆనందంపై నీళ్లు చల్లొద్దన్నారు. ఈ సెక్షన్‌ను అమలు చేస్తే రెండు తెలుగు రాష్ర్టాల మధ్య ఉధ్రిక్త పరిస్థితులు ఏర్పడే అవకాశం ఉందన్నారు. సెక్షన్-8 అమలును కేంద్రానికి అప్పగించి తప్పు చేయొద్దన్నారు. ఈ బాధ్యతను తెలంగాణ సీఎం కేసీఆర్ చూసుకోవాలని సూచించారు.

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!