బీజేపీవారు! మీరు
పగటి కలలు కనుచుంటిరి!
ఇద్దరు నాయుళ్ళ నమ్మి
సర్వం కోల్పోనుంటిరి!!
తెలగాణకు మద్దతునిడి
కాతుమనుచు నాడు పలికి,
నేడు మాట మార్చు తీరు
సందేహం కలిగించెను!
ఎప్పటినుంచో మద్దతు
నిత్తుమనుచు చెబుతూనే,
ఈనగాచి నక్కలపాల్
చేయనెంతురేలండీ?
చంద్రబాబు వెంకయ్యల
మాట విన్నచో నిక్కడ
తెలంగాణలో పార్టీ
గల్లంతౌ సుమండీ!
సీమలోన వెంకయ్యకు
ఒక్క ఓటు కూడ రాదు!
చంద్రబాబు ముఖం చూచి
ఒక్క సీటు కూడ రాదు!!
బీజేపికి శాపమగును
ఇద్దరు నాయుళ్ళ దోస్తి!
వరమగునని తలంచుచో
చేతురు ప్రజ తగిన శాస్తి!!
ఇచ్చిన మద్దతు మీరలు
తుంగలోన తొక్కినచో,
సీమాంధ్రులు, తెలగాణులు
లేవకుండ తొక్కుదురయ!
అందితేను జుట్టనుచో,
అందకున్న కాళ్ళనుచో,
అవకాశపు వాదమగును!
రెంట జెడిన రేవళ్ళగు!!
సుష్మ ఒక్క మాట పలుక,
అద్వాని మరొక్కటనగ,
రాజనాథుడింకొకటన,
కుక్కచింపు విస్తరియగు!
మందిమాట పట్టుకొనియు,
మారు మనువు పోయి, చెడియు,
మరలి వచ్చి చూడగాను
ఇల్లు కాలిపోవునండి!
మీరు మద్దతీయకున్న
కాంగ్రెస్సుకు నష్టమేమి?
వారల వ్యూహములు వారె
సిద్ధపరచుకొనిరండీ!
మాట నిలుపుకొనకున్నచొ
మరణమ్మే మేలందురు!
ఆడి తప్పబోకండీ!
మద్దతీయగారండీ!!
ముగ్గురు నేతలిపుడొక్క
మాటపైన నిలబడండి!
తెలగాణకు మీ మాటను
మరల నొక్కి చెప్పండీ!!
తెలగాణను నష్టపరచు
మార్గమ్మును వీడండీ!
భావి విజయములకు నేడె
మార్గములను వేయండీ!!
జై తెలంగాణ! జై జై తెలంగాణ!
