’రామసేతు’ను చూసినట్టుగా...’భద్రాచలం”ను చూడరా...???

సేతు సముద్రం ప్రాజెక్టు కోసం పది కిలోమీటర్ల శిలను తొలిస్తేనే,

పర్యావరణానికి ముప్పు అని, సముద్ర జలాలకు ఆవాసం లేకుండా
పోతుందని, ఔషధ మొక్కలు నాశనం అవుతాయని, అరుదైన జాతి జీవాలు, వృక్షాలు కనుమరుగు అవుతాయని గగ్గోలు పెట్టారు. మరి లక్షల ఎకరాలు ముంచి పోలవరం కడితే పర్యావరణానికి ఎంత ముప్పు కలగాలి?
ఎంత మంది నిరాశ్రయులు కావాలి? ఎన్ని అరుదైన జాతులు అంతరించాలి? 

’ఇది రామభక్తుల ప్రభుత్వం. జై శ్రీరాం నినాదాలు చేసే వారిది!’ అని కేంద్ర మంత్రి, బిజెపి జాతీయ మాజీ అధ్యక్షుడు నితీష్ గడ్కరీ ఇటీవలే ప్రకటించారు. సంతానం విషయంలో, పీకే సినిమా విషయంలో కాషాయదండు నుంచి చాలా ప్రకటనలు వస్తున్నాయి. ఢిల్లీ ఎన్నికల నేపథ్యంలో ఇలాంటి ప్రకటనల లక్ష్యం అర్థం చేసుకోవచ్చు. కానీ కేంద్రం ప్రభుత్వం ఇటీవల చేస్తున్న కొన్నిపనులు, ప్రయత్నాలు తాము నిజమైన రామభక్తులమని, రాముడి చరిత్ర అవశేషాల పరిరక్షకులమని చాటే విధంగానే ఉన్నాయి. రెండు వేల కోట్ల రూపాయల వ్యయంతో అయోధ్య నుంచి నేపాల్ లోని జానక్‍పూర్‍కు ఓ రహదారి నిర్మించడానికి కేంద్రం ఏర్పాట్లు చేస్తోంది. రాముడు 14 ఏళ్ల వనవాసం పూర్తి చేసేందుకు చిత్రకూట్‍లోని అడవులకు ఈ మార్గం ద్వారానే వెళ్లారు కాబట్టి, ఈ దారికి ప్రాధాన్యం ఇస్తున్నట్లు కూడా కేంద్ర ప్రభుత్వం ప్రకటించింది. ఇలాంటి నిర్మాణాలు, ప్రయత్నాలు గతంలో కూడా చాలానే జరిగాయి. అసలు రాముడి పేరు చెప్పుకునే బిజెపి ఇవాళ ఈ స్థాయికి వచ్చింది. రాముడిపై బిజెపికే పేటెంట్ హక్కు ఉందన్నట్లు ఉంటుంది ఆ పార్టీ ధోరణి. అందుకే రాముడి చరిత్రకు సంబంధించిన ఏ అంశానికైనా బిజెపి ప్రభుత్వం ప్రాధాన్యం ఇస్తుందనే అభిప్రాయం సామాన్యులకు కలుగుతుంది. రాముడు పుట్టినట్లు చెబుతున్న అయోధ్యలో రామమందిరం నిర్మాణం కోసం బిజెపి కట్టుబడి ఉందని ఆ పార్టీ ప్రతీ ఎన్నికల్లో చెబుతూ వస్తుంది కూడా. సీతను అపహరించి బంధించిన లంకకు వెళ్లడానికి రామసేతును నిర్మించినట్లు చెబుతున్న ప్రాంతాన్ని కూడా అలాగే పరిరక్షిస్తామని, రామసేతును ధ్వంసం చేసేది లేదని కూడా బిజెపి నాయకులు, కేంద్ర ప్రభుత్వ పెద్దలు అవసరం ఉన్నా , లేకపోయినా ప్రతీ సారీ చెబుతూనే ఉన్నారు. కానీ, రాముడి చరిత్రకు సంబంధించి ప్రచారంలో ఉన్న కథనాలు, రాముడి జీవితంతో ముడిపడి ఉన్నట్లు చెబుతున్న ప్రాంతాలన్నింటి విషయంలోనూ బిజెపి ఇదే వైఖరి కలిగి ఉందా? అనేది విశ్లేషించుకుంటే బిజెపి ద్వంద్వ వైఖరి బయటపడుతుంది.

రామసేతు విషయంలో హిందువుల మనోభావాల పేరుతో బిజెపి, సంఘ్ పరివార్ నాయకులు చేస్తున్న హంగామా దేశ ఆర్థిక వ్యవస్థపైనే ప్రభావం చూపుతుంది. హిందూ మహాసముద్రం ద్వారా వివిధ దేశాల నుంచి వచ్చే నౌకలు భారత్ చేరుకోవాలంటే ప్రస్తుతం శ్రీలంక అవతలి నుంచి రావాల్సి వస్తుంది. వేరే దేశం నుంచే కాదు, భారత దేశంలోని అరేబియా తీర ప్రాంతాల నుంచి ఇతర నగరాల నుంచి హిందూ మహాసముద్ర తీర ప్రాంతాలకు నౌకలు చేరుకోవడానికి కూడా శ్రీలంక దేశం నుంచి తిరిగి రావడం ఆర్థికంగా, సమయపరంగా కూడా భారమే.
మలేసియా, తైవాన్, సింగపూర్‌తో పాటు గల్ఫ్ దేశాల నుంచి వచ్చే నౌకలు, దేశంలోని ముంబాయి తదితర నగరాల నుంచి వచ్చే నౌకలు 424 నాటికల్ మైళ్లు(780 కిలోమీటర్లు) దూరం, 30 గంటల సమయం అదనంగా ప్రయాణం చేయాల్సి వస్తున్నది. మద్రాస్, తుతుకుడి, కన్యాకుమారి లాంటి ప్రాంతాలకు భారత పరిధిలోని సముద్ర జలాలలకు ఆనుకునే ఉన్నప్పటికీ, అక్కడ సముద్రంలో ఉన్న పర్వత శ్రేణులు, శిలల వల్ల నౌకల రాకపోకలు కుదరడం లేదు. రామేశ్వరం సమీపంలోని ధనుష్కోటి నుంచి శ్రీలంక వరకు ఇదే పరిస్థితి నెలకొంది. దాని వల్లే నౌకలు నేరుగా భారత్ చేరుకోవడం లేదు. ఇది సరుకు దిగుమతి చేసుకునే భారత్‍పై ఎంతో భారం పడే అంశం. ఈ దూరాన్ని, భారాన్ని తగ్గించడానికి సేతు సముద్రం కెనాల్ ప్రాజెక్టును ప్రతిపాదించారు. భారత దేశానికి స్వాతంత్య్రం రాక ముందు నుంచి మొదలుకుంటే నేటి వరకు ఇందుకోసం ప్రతిపాదనలు సిద్ధం చేయడం...ఏదో ఓ కారణం చేత ఆగిపోవడం...పరిపాటిగా మారింది. యుపిఎ ప్రభుత్వం ఉన్నప్పుడు, అందులో డిఎంకె భాగస్వామిగా ఉన్నప్పుడు మరోసారి ఈ ప్రాజెక్టు తెరమీదికి వచ్చింది. అప్పటి కేంద్ర షిప్పింగ్ మంత్రి టిఆర్ బాలు ఈ ప్రాజెక్టు కట్టి తీరాల్సిందే అనే పట్టుదల ప్రదర్శించారు. కరుణానిధి కూడా అండగా నిలిచారు. ధనుష్కొటి-శ్రీలంకల మధ్య సముద్ర జలాల్లో ఉన్న రాళ్ళను, గుట్టలకు ఓ పది కిలోమీటర్ల మేర తొలగిస్తే నౌకలు శ్రీలంక అవతలి నుంచి రావాల్సిన అవసరం ఉండదు.
కన్యాకుమారి పక్క నుంచే రావచ్చు. కానీ ఈ ప్రాజెక్టును బిజెపి, సంఘ్ పరివార్ తీవ్రంగా వ్యతిరేకించాయి. ధనుష్కోటి-శ్రీలంకల మధ్య సముద్రంలో ఉన్న పర్వతం లాంటి ప్రాంతం సహజసిద్ధంగా ఏర్పడింది కాదని వాదించాయి. అది సీతను రావణాసురుడి చెరనుంచి విడిపించడానికి రాముడు వెళ్లడానికి నిర్మించిన వారధి అని రామాయణం వినిపించాయి. దాన్ని తొలగించడమంటే రాముని చరిత్ర ఆనవాళ్లను చెరిపేయడమే అని ఆందోళన వ్యక్తం చేశాయి. ఆ బండరాళ్లను ఆధారం చేసుకుని ఎన్నో జలజీవాలున్నాయని, ఔషధ మొక్కలున్నాయని, వాటిని రక్షించడం కూడా ముఖ్యమేనని చెప్పాయి. ఆ శిలలను తొలగిస్తే పర్యావరణానికి కూడా ముప్పు అని వాదించాయి. ఈ వాదనను డిఎంకె, మరికొన్ని పక్షాలు తీవ్రంగా ఖండించాయి. అసలు రాముడి వారధి అని చెప్పడానికి ఒక్క ఆధారమూ లేదని, శిలలను తొలగించకుండా అడ్డుపడడమంటే అభివృద్ధికి అడ్డుపడడమే అని కూడా కరుణానిధి చెప్పారు. ఆ వాద, ప్రతివాదనల నేపథ్యంలో సేతుసముద్రం కెనాల్ ప్రాజెక్టు మూలన పడింది.
రాముడు అయోధ్యలో పుట్టాడని, చిత్రకూట్ లోని అడవుల్లో సంచరించాడని, లంకకు వారధి కట్టారని నమ్మే ప్రతీ ఒక్కరు...భద్రాచలం ప్రాంతంలో రాముడి అడుగు జాడలను కూడా నమ్ముతారు. వనవాసంలో భాగంగా రాముడు భద్రాచలం అడవుల్లో కూడా గడిపాడని రామాయణం నమ్మే వారంతా విశ్వసిస్తారు. దక్షిణ అయోధ్యగా కూడా భద్రాచలానికి పేరుంది. సీతారామచంద్రులు ఎంతో అన్యోఽన్యంగా, ప్రేమగా గడిపిన ప్రాంతంగా భద్రాచలాన్ని చెప్పుకుంటారు. ఈ ప్రాంత పరిసరాలన్నీ రాముడి కథతో ముడిపడి ఉన్నవే. వాల్మీకి మహర్షి వర్ణించిన ప్రస్రవణ పర్వతములనే ’పాపికొండలు’ అని పిలుస్తున్నారు. రామాయణ గాథ ప్రకారం... సీతమ్మను ఎత్తుకుపోతున్న సందర్భంలో పక్షిరాజు జటాయువు రావణాసురుడ్ని అడ్డగిస్తుంది. రావణుడితో పోరాడుతుంది. అప్పుడు రావణుడు కత్తితో జటాయువుపై దాడి చేస్తాడు. ఆ దాడిలో జటాయువు రెక్క విరిగి కింద పడుతుంది. ఆ రెక్కపడిన ప్రాంతమే నేటి ’రేకపల్ల”. మొండెం పడిన ప్రాంతమే ’శ్రీరామగిర”. ఆ జటాయువును రాముడు తండ్రితో సమానంగా భావించి పిండప్రదానం చేస్తాడు. ఆ ప్రాంతాన్నే ’జటాయుబండ’గా పిలుస్తున్నారు. చలికాలంలో సీతమ్మ స్నానం చేయడానికి రాముడు గోదావరి నది నీటిని తన ఆగ్నేయాస్త్రంతో వేడి చేస్తాడు. రెండు గుంటల్లో నీరు ఇప్పటికీ వేడిగా ఉంటుంది. వాటినే ఇప్పుడు ’ఉష్ణగుండాలు’గా పిలుస్తారు. 
భద్రాచలం చుట్టుపక్కల ఉన్న పర్ణశాల, రేకపల్లి, పాపికొండలు, జటాయుబండ, శ్రీరామగిరి, ఉష్ణగుండాలు.. ఇవన్నీ రాముడి కథతో సంబంధం ఉన్న ప్రాంతాలే. వీటిలో పర్ణశాల, భద్రాచలం తెలంగాణలో మిగిలిపోగా.. రేకపల్లి, పాపికొండలు, జటాయుబండ, ఉష్ణగుండాలు, శ్రీరామగిరి ఆంధ్రప్రదేశ్‍లో కలిసిపోయాయి. ఆంధ్రప్రదేశ్‌లో కలిసిన ప్రాంతాలన్నీ పోలవరం ప్రాజెక్టువల్ల ముంపుకు గురై, జలసమాధి కానున్నాయి. 

సేతు సముద్రం ప్రాజెక్టు వల్ల దేశానికి ఎంతో ఉపయోగం ఉన్నప్పటికీ అది రాముడి వారధి కాబట్టి దాన్ని ముట్టుకోవద్దంటున్నారు.

మరి పోలవరం ప్రాజెక్టు వల్ల కూడా రాముడి చరిత్రలో భాగమైన ప్రాంతాలన్నీ మునిగిపోనున్నాయి...కనుమరుగు కానున్నాయి.

బిజెపి ప్రభుత్వమే పోలవరాన్ని జాతీయ ప్రాజెక్టుగా గుర్తించి, డబ్బులిచ్చి కట్టిస్తోంది.

మరి రామసేతుకు వర్తించిన నియమాలు భద్రాచలానికి, పోలవరానికి వర్తించవా?

సేతు సముద్రం ప్రాజెక్టు కోసం పది కిలోమీటర్ల శిలను తొలిస్తేనే, పర్యావరణానికి ముప్పు అని, సముద్ర జలాలకు ఆవాసం లేకుండా పోతుందని, ఔషధ మొక్కలు నాశనం అవుతాయని, అరుదైన జాతి జీవాలు, వృక్షాలు కనుమరుగు అవుతాయని గగ్గోలు పెట్టారు.

మరి లక్షల ఎకరాలు ముంచి పోలవరం కడితే పర్యావరణానికి ఎంత ముప్పు కలగాలి? ఎంత మంది నిరాశ్రయులు కావాలి? ఎన్ని అరుదైన జాతులు అంతరించాలి?

ఇది రామభక్తుల ప్రభుత్వమని కేంద్ర మంత్రులు చాటుకుంటున్నారు.

రామసేతు విషయంలో ప్రదర్శించిన రామభక్తిని భద్రాచలం విషయంలో ఎందుకు ప్రదర్శించడం లేదు.

రామభక్తి కూడా అవకాశవాదంలో భాగమేనా?

వీళ్ళు ’రామసేతు’ను చూసినట్టుగా...’భద్రాచలం’ను చూడరా???

-గటిక విజయకుమార్

(ఆధారంకై: రామసేతు...భద్రాచలం...పై నొక్కండి)

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!!

ఇంటి దొంగలు 1,150 మంది...!!!

-ఇందిరమ్మ స్కాంపై సీఐడీ నివేదిక సిద్ధం
-రెండురోజుల్లో ప్రభుత్వానికి సమర్పణ
-18 నియోజకవర్గాల్లో 36 గ్రామాల పరిశీలన
-రూ. 250 కోట్లు దుర్వినియోగం జరిగినట్లు ప్రాథమిక విచారణలో గుర్తింపు
-ప్రభుత్వం అనుమతితో తదుపరి చర్యలు

ఇందిరమ్మ ఇండ్ల పథకంలో అక్రమార్కుల చిట్టా సిద్ధమైంది. ఆరునెలలుగా దర్యాప్తు సాగిస్తున్న సీఐడీ ఇందిరమ్మ ఇండ్ల స్కాంలో ప్రభుత్వ ఉద్యోగులు, ప్రైవేట్ వ్యక్తులు.. ఇలా దాదాపు 1150 మందిని నిందితులుగా గుర్తించింది. అందులో భాగంగా హౌసింగ్ డీఈలు, ఏఈలు, ఎండీవోలు, ఎంఆర్‌వోలు, వీఆర్‌వోలు, వీఓలు, బ్రోకర్లు, డబుల్ బెనిఫిషియర్లను నిందితులుగా చేర్చినట్టు సీఐడీ ఉన్నతాధికారులు తెలిపారు.

రాష్ట్రవ్యాప్తంగా 18 నియోజకవర్గాల్లోని 36 గ్రామాల్లో ప్రాథమిక విచారణ జరిపిన సీఐడీ, దర్యాప్తు చేసి నివేదిక రూపొందిస్తున్నది. రెండురోజుల్లో ఇందిరమ్మ గృహాల్లో జరిగిన అక్రమాలపై పూర్తిస్థాయి నివేదికను ప్రభుత్వానికి సమర్పించనున్నట్టు తెలిసింది. అయితే కేవలం 36 గ్రామాల్లో జరిపిన ప్రాథమిక విచారణలో రూ.250 కోట్లవరకు నిధులు దుర్వినియోగం అయినట్టు అధికారులు తేల్చారు. ఇల్లు మంజూరై నిర్మించుకున్న విషయం అర్హత పొందిన వ్యక్తికి తెలియకుండానే బ్యాంక్ అకౌంట్లు ఓపెన్ చేశారు.

ఇక ఇండ్లు కట్టకుండానే కట్టినట్టు ఫొటోలు సృష్టించారు. వాటికి డీఈలు, ఏఈలు, ఎండీవోలు, ఎంఆర్‌వోలు, వీఓలు.. బిల్లులు మంజూరు చేసి భారీ ఎత్తున నిధులు దుర్వినియోగం చేశారు. దళారులు అర్హుడి పేరిట బ్యాంక్ అకౌంట్లు ఓపెన్ చేసి వారికి తెలియకుండానే డబ్బులు కూడా డ్రా చేసినట్టు సీఐడీ ఆధారాలతో సహా బయటపెట్టింది.


దర్యాప్తు జరిపిన నియోజకవర్గాలు..రాష్ట్రంలోని తొమ్మిది జిల్లాల్లో శాంపిల్ సర్వే పేరిట దర్యాప్తు చేపట్టిన సీఐడీ.. ప్రతి జిల్లాలో ఒక్కో కేసు నమోదు చేసింది. ఈ కేసులను విచారణ జరిపేందుకు జిల్లాకో బృందాన్ని ఏర్పాటుచేసింది. ఇలా తొమ్మిది బృందాలు గ్రామస్థాయిలో దర్యాప్తు చేశాయి. ఇండ్ల స్కాంలో ఉన్న ప్రతి గ్రామాన్ని తిరగడం కష్టసాధ్యం కాబట్టి రాష్ట్రవ్యాప్తంగా 18 నియోజకవర్గాలను ఎంచుకుంది. జిల్లాకు రెండు నియోజకవర్గాలు, నియోజకవర్గానికి రెండు గ్రామాల చొప్పున ఎంచుకొని దర్యాప్తు ప్రారంభించింది. మండలాల్లోని ఎంపీడీవో, ఎంఆర్‌ఓ కార్యాలయాల నుంచి ఇండ్ల మంజూరు, నిధులు, వాటి లెక్కలకు సంబంధించిన పూర్తి స్థాయి డాక్యుమెంట్లను స్వాధీనంచేసుకుంది.

ఎంచుకున్న రెండు గ్రామాల్లోకి వెళ్లి ప్రతిఒక్క లబ్ధిదారుడిని ప్రశ్నించింది. అసలు ఇండ్లే కట్టకుండా లక్షల్లో నిధులు నొక్కేశారని సీఐడీ ఆధారాలతో సహా తేల్చింది. ఇలా నారాయణ్‌ఖేడ్, ఆందోల్, డోర్నకల్, భూపాలపల్లి, పాలేరు, అశ్వారావుపేట, ఎల్లారెడ్డి, బోధన్, మంథని, హుజురాబాద్, నాగార్జునసాగర్, దేవరకొండ, ఖానాపూర్, ఆసిఫాబాద్, కొడంగల్, అలంపూర్, తాండూర్, పరిగి నియోజకవర్గాల్లో ఇందిరమ్మ ఇండ్ల నిర్మాణం నిధులు పక్కదారి పట్టాయని స్పష్టంగా నివేదికలో పొందుపరిచినట్లు తెలిసింది.

1. (నమస్తే తెలంగాణ దినపత్రిక సౌజన్యంతో)

జై తెలంగాణ!   జై జై తెలంగాణ!!

మహాత్ముడు...మహానేత...కేసీఆర్!!!

(నమస్తే తెలంగాణ దినపత్రిక సౌజన్యంతో)

అహింసే ఆయుధంగా.. తెలంగాణను నడిపించినవాడు!!

కొందరు గుర్తించవచ్చు. కొందరు గుర్తించ నిరాకరించనూ వచ్చు. కానీ తెలంగాణ రాష్ట్ర సాధన అషామాషీ కార్యక్రమం కాదు. ఏదో పుస్తకాల్లో.. ఎవరో రాసిన లేదా తయారు చేసిన నమూనాను తీసుకువచ్చి పదేపదే ప్రతి కార్యక్రమానికి ఆ పుస్తకాన్ని తిరగేసి మార్గదర్శనం పొందడం ద్వారా సాధించింది అంతకన్నా కాదు. తెలంగాణను.. ఇక్కడి మనుషులను..సమాజస్థాయిని.. ఇక్కడి ప్రభుత్వాన్ని.. దేశకాల పరిస్థితులను.. ప్రపంచవ్యాప్త ధోరణులను అన్నింటినీ అవపోసన పట్టి మేధోమథనం చేసి రూపకల్పన చేసిన గొప్ప ప్రణాళిక.

ఈ ప్రణాళికను అంచెలంచెలుగా అమలుచేసి అనుకున్నది సాధించిన వీరుడు కేసీఆర్. ప్రాంతాలు వెనుకబడి ఉండడం ద్వారా ప్రజల ఆలోచనలు కురచగా మారుతాయా? లేక మనుషుల ఆలోచనల కురచదనం వల్ల ప్రాంతాలు వెనుకబడతాయా? అనేది ఇదమిద్ధంగా చెప్పలేం కానీ.. ఇలాంటి సమాజాల్లో ఒక్క అడుగు ముందుకు వేయడం కూడా చాలా కష్టం. వేయి మంది వెనక్కి లాగే వారుంటారు. ప్రజలు సులభంగా విశ్వసించరు. నిందలు వేసేవారు వేనవేలు. అగ్నిపరీక్షలకు నిలబడాలి. త్యాగాలకు సిద్ధపడాలి. ఎదురైన ప్రతి ప్రశ్నకూ జవాబు చెప్పాలి. ఆ పరీక్షలన్నింటినీ కేసీఆర్ ఎదుర్కొన్నారు. అనుకున్న మార్గంలో ఉద్యమరథాన్ని నడిపి గమ్యాన్ని ముద్దాడారు.

కొత్తమార్గం..: రాష్ట్రసాధనకు కేసీఆర్ ఎంచుకున్నది కొత్తపంథానే. పాపమో.. శాపమో కానీ మన దేశంలో ఏ ఒక్క రాష్ట్రం కూడా నెత్తురోడకుండా ఏర్పాటు కాలేదు. ఓం ప్రథమం ఆంధ్ర రాష్ట్రమే పొట్టి శ్రీరాములు ఆత్మత్యాగం.. అదుపు తప్పిన హింసలోంచి పుట్టుకు వచ్చింది. ఆ వేళావిశేషం అన్ని రాష్ర్టాలు హింసాత్మక వాతావరణాలనుంచే పుట్టాయి. తెలంగాణ ఏర్పాటుకు ముందు ఆవిర్భవించిన చివరి మూడు రాష్ర్టాలు జార్ఖండ్, ఉత్తరాంచల్, వనాంచల్(ఛత్తీస్‌గఢ్)లకు కూడా హింసాత్మక ఉద్యమాల చరిత్ర ఉంది. ఇక తెలంగాణ ప్రజాఉద్యమాలకు రక్తసిక్త చరిత్ర ఉంది. ఇడ్లీసాంబార్ గోబ్యాక్‌నుంచి జై తెలంగాణ దాకా అన్నీ హింసను ఆశ్రయించుకున్నవే. ఫలితంగా అనేక మంది బిడ్డలను పోగొట్టుకున్న అనుభవం. ఆ మార్గాలు విజయం సాధించలేకపోవడం కండ్లముందున్న ఉదాహరణ. మహాశక్తి మంతమైన మదగజంకూడా అంకుశం పోటుకు లొంగిపోతుంది. ప్రభుత్వాలను వంచే అంకుశం పార్లమెంటు.

దాన్ని సాధించేది రాజకీయ ప్రజాస్వామ్య పంథా. తెలంగాణ సాధనకు కేసీఆర్ ఆ పంథాను ఎంచుకున్నారు. ఎన్నికల్లో పోటీ చేసి అధికసీట్లు సాధించడం ద్వారా ప్రభుత్వాలను లొంగదీసి రాష్ర్టాన్ని సాధించడం.. 14 ఏండ్లపాటు సడలించకుండా జరిపిన నిరంతర ఉద్యమాలతో మదగజం తలొగ్గింది. తెలంగాణ సాకారమైంది. ఈ మధ్య కాలంలో ఎన్ని నిందలు? ఎన్ని ఆరోపణలు? ఎంతటి వెటకారాలు? ఎన్ని వెన్నుపోట్లు?... ఓట్లు సీట్లతో రాదన్నారు. పదవుల కోసమే తెలంగాణ అని నిందలు వేశారు. ప్రజాఉద్యమాలు మాత్రమే తెలంగాణ తెస్తాయని ప్రవచించారు. కానీ... సడలని నమ్మకం విజయం సాధించింది. రాజకీయ పంథాయే గెలుపు మార్గమైంది. మార్గాన్ని తెలిసిన వాడు మార్గదర్శకుడు.

కేసీఆర్..మార్గదర్శకుడు!! కలలు కన్నవాడు..

నాకో కల ఉంది... ఏదో ఒక రోజు ఈ దేశంలో నా నలుగురు పిల్లలూ వాళ్ల రంగును బట్టి కాకుండా వారి సామర్థ్యంతో గుర్తించబడతారని...నాకో కల ఉంది. ఒక రోజు అలబామాలో నల్లజాతి పిల్లలు, తెల్లజాతి పిల్లలు అన్నాతముళ్లు అక్కా చెల్లెళ్లలాగా చేతులు కలుపుతారని... 1963 ఆగస్టు 28న వాషింగ్టన్‌లో రెండు లక్షల మంది నల్లజాతి పౌరహక్కుల ఉద్యమకారులనుద్దేశించి మార్టిన్ లూథర్‌కింగ్ చేసిన చారిత్రక ఐ హావ్ ఏ డ్రీమ్‌ప్రసంగ మిది.

అచిరకాలంలోనే ఆయన కోరిక నేరవేరింది. జాతి విచక్షణ అంతం చేసే బిల్లును అమెరికా పార్లమెంటు ఆమోదించింది. కేసీఆర్ కూడా అలాంటి స్వాప్నికుడే. తెలంగాణ తప్పక సాకారమవుతుంది. ఎందుకంటే మాది ధర్మపోరాటం. మాది మాకు కావాలని అడుగుతున్నం. ఇంకొకల్లది కావాలని అంటలేం.... ఒక రోజు వస్తది. తెలంగాణ మొత్తానికి మొత్తం గిరిగీసి ఒక్క దిక్కు నిలబడతది. మా తెలంగాణ మాకు ఇవ్వాలని గర్జిస్తది. ప్రజలంతా ఒక్కతాటి మీదికి వచ్చినంక ఆ ప్రజాస్వామిక ఆకాంక్షను పార్లమెంటు కానీ కేంద్రం కానీ గుర్తించక తప్పదు. కోట్ల మంది ప్రజల ఆకాంక్షను ఎంత గొప్ప ప్రభుత్వం కూడా బుల్డోజ్ చేయడం సాధ్యం కాదు.... తెలంగాణ ఒక రాష్ట్రంగా నిలబడదనేది దుష్ప్రచారం. ఆర్థిక పరిస్థితి బ్రహ్మాండంగా ఉంటది. మీరు చూస్తూ ఉండండి... మేం రాష్ర్టాన్ని కడుక్కు తాగటానికి అడగడం లేదు. ఇక్కడ అద్భుతమైన వనరులు ఉన్నై. రేపటి రాష్ట్రంలో ప్రజలు బాగుపడాలి. నదుల నీళ్లు మళ్లించి బీడు భూములు సస్య శ్యామలం చేయాలి. ప్రపంచంలోనే అద్భుతమైన వాతావరణం తెలంగాణది.

ఇక్కడ పరిశ్రమలు వెల్లువెత్తాలి. ఇప్పటికే వరల్డ్ సీఈవోల సమావేశం హైదరాబాద్‌ను పరిశ్రమల స్థాపనకు ఉత్తమమైందని ప్రకటించింది. పారిశ్రామికవేత్తలకు రెడ్‌కార్పెట్ స్వాగతం పలుకుతం. ఇక్కడి నేలలు విత్తనాభివృద్ధికి ఎంతో అనుకూలం తెలంగాణను సీడ్ బౌల్ ఆఫ్ ఇండియాగా తయారు చేస్తం. ఇక కేజీ టు పీజీ నాకున్న పెద్ద కల. ఒక జనరేషన్‌ను మనం తీర్చి దిద్దితే అనేక తరాలు బాగుపడతయ్..ఇది ఓ సీమాంధ్ర టీవీ చానెల్ ఇంటర్వ్యూలో కేసీఆర్ ఆవిష్కరించిన ఆయన స్వప్నం. ఇవాళ ఆ స్వప్నాన్ని పాలనలో తర్జుమా చేయడం చూస్తున్నాం.

శ్రీకృష్ణ కమిటీ నిరాశ పరిచిన వేళ...

ఉద్యమ నేత ఉద్రేకాలు రేపటమే కాదు.. కష్టాల్లో అండగా ఉండి కన్నీళ్లు తుడవాలి. భరోసానివ్వాలి. తెలంగాణ ఎంతో ఉత్కంఠతో ఎదురుచూసిన శ్రీకృష్ణ కమిటీ నివేదిక యువకులు, విద్యార్థుల మనోధైర్యాన్ని దెబ్బ తీసిన వేళ..బలిదానాలు పెరుగుతున్న వేళ కేసీఆర్ చేసిన ప్రసంగం వారికి కౌన్సెలింగ్. ఇందిరాపార్కు వద్ద జేఏసీ ఆధ్వర్యంలో జరిగిన సమావేశంలో కేసీఆర్ చెప్పిన మాటలు వారిలో మనోధైర్యాన్ని కలిపించింది. శ్రీకృష్ణ కమిటీ రిపోర్టు..ఎట్లున్నదంటె ఇటున్నోడు ఇటు చెప్పుకోవచ్చు.. అటున్నోడు అటు చెప్పుకోవచ్చు. ఎవ్వనికి వాటమున్నట్టు వాడు చెప్పుకోవచ్చు. మేం సాఫ్‌సీదా మాట చెప్తున్నం.

తెలంగాణకు వాటమున్నది ఏందంటె.. రివర్టింగ్ బ్యాక్ టు నైంటీన్ ఫిఫ్టీసిక్స్ అని అన్నరు.. మాకు గావల్సింది అదే...మేము అడుగుతున్నదిగూడగదె.. అని చెప్పి సాంత్వన కలిగించారు. కమిటీ నివేదికతో కథ ముగిసి పోలేదని చెప్పేందుకు అదే వేదిక మీద ఉద్యమ మార్గం ప్రకటించారు. జేఏసీ చైర్మన్ కోదండరాం నేతృత్వంలో తిరిగి ఉద్యమం ప్రారంభించబోతున్నామని ప్రకటించారు. నిరాశపడ్డ యువతకు గుండెల్లో బాధ గాలిపింజల్లా తేలిపోగా ఈ మాటలు ఎంతో ధైర్యాన్ని కలిగించాయి. అదే సమయంలో బలిదానాలు తన మనోధైర్యాన్ని దెబ్బతీస్తాయని కేసీఆర్ యువతకు సందేశం పంపిచారు.

నేను తెలంగాణ యువకులకు, తెలంగాణ విద్యార్థులకు దండం పెట్టి చెప్తున్న.. మీ కడుపుల తల పెట్టి చెప్తున్న.. మీరు మిమ్ములను మీరు కాల్చుకోని చచ్చిపోతె.. మేంగూడ ఇక్కడ సగం కాలిచచ్చిపోతం. కూలిపోతం. మానసికంగ దెబ్బతింటం. కాబట్టి దయచేసి ఎవ్వరుగూడ భయపడొద్దు. కచ్చితంగా తెలంగాణ వచ్చే కోసం వచ్చేవరకు మనం పోరాటం చేద్దాం. ఎనుకకు పోయె సమస్యే లేదు. మడమ తిప్పే ముచ్చటే లేదు. ఎవ్వరుగూడ దయచేసి ఆత్మహత్యలు చేసుకోవద్దు. ఇగ తప్పదనుకుంటె గిట్ట నేనే దీక్షకుపోత.. ఉంటె ఉంటా పోతెపోత. ఇగ ఎందాకైతె అందాక! అంటూ చెప్పిన ఆయన మాటలు యువత మనోధైర్యాన్ని రీచార్జి చేశాయి.

కేసీఆర్.. సాంత్వననిచ్చిన సమాజ వైద్యుడు !!
జాతికి ఔన్నత్యం గుర్తుచేసిన వాడు..

ఏ జాతి అయినా తన పూర్వీకులనుంచి.. వారసత్వంనుంచి స్ఫూర్థి పొందుతుంది. ఘనమైన వారసత్వం.. తిరిగి దాన్ని సాధించాలనే కాంక్షకు కారణమవుతుంది. కేసీఆర్‌కు ముందు తెలంగాణ ఔన్నత్యం గురించిన ప్రచారం లేదు. సీమాంధ్రపాలకుల పుస్తకాల్లో తెలంగాణలో అంధకారయుగం అన్నారు. ఆ అంధకారంలో ఉన్న తెలంగాణకు అత్యున్నత చారిత్రక నేపథ్యం, సాంస్కృతిక వారసత్వం ఉందని ఊరూరా చాటింది కేసీఆర్. అలాగే మోహావేశ బంధనమైన తెలుగు తల్లి భావనకు బద్దలు కొట్టిందీ కేసీఆరే. తెలంగాణ తల్లికి రూపమిచ్చి ఊరూరా విగ్రహాలు సృష్టించింది ఆయనే. ఇక నిజాం వారసత్వం మీద తెలంగాణ చరిత్ర మీద జరిగిన దుష్ప్రచారాన్ని చీల్చి చండాడింది కూడా కేసీఆరే. ఒకనాటి హైదరాబాద్ రాష్ట్ర సిరిసంపదలు, వసతులు, వనరులు, వైభవాన్ని చరిత్రకారులు శోధించి వెలికితీయడం దానికి జత కూడింది. గొప్ప వారసత్వం ఉన్న జాతి జరిపిన ఏ పోరాటం విఫలమైన చరిత్ర లేదు. అది తెలంగాణలోనూ వాస్తవరూపం దాల్చింది.

కేసీఆర్.. ఒక స్ఫూర్తి ప్రదాత!!
గాంధీ మార్గంలోనే..

తెలంగాణ సాధనకు కేసీఆర్ నడిపిన ఉద్యమానికి స్వాతంత్య్రం కోసం గాంధీ నడిపిన ఉద్యమానికి అనేక పోలికలు కనిపిస్తాయి. రెండు ఉద్యమాల్లో ఎక్కడా ఏ దశలోనూ హింసకు తావునివ్వలేదు. అహింస, సత్యాగ్రహం ఆయుధాలుగా గాంధీ ఉద్యమం సాగితే, కేసీఆర్ అదే రీతిలో ఉద్యమాన్ని నడిపించారు. ఒక్క చుక్క నెత్తురు నేల రాలకూడదు అని జలదృశ్యంనాడు చెప్పిన మాట అక్షరాలా అమలు చేశారు. ఆ స్ఫూర్తినే ప్రజలు కూడా అందుకున్నారు. సీమాంధ్ర ప్రభుత్వం, రాజకీయ పక్షాలు నాయకులు ఎంత దుర్మార్గంగా వ్యవహరించినా ఏ దశలోనూ ఏ ఒక్క సీమాంధ్రునిపై చేయి వేసిన సందర్భం లేదు. నిరాశ కమ్మిన వేళ తమను తాము దహించుకున్నారే తప్ప దాడులకు దిగలేదు. బతుకమ్మలాటలు...తెలంగాణ సంబురాలు..వంటా వార్పు వంటి కార్యక్రమాలు ప్రజాగ్రహాన్ని సాంస్కృతిక రూపంలో వెలువరించేందుకు ఉపకరించాయి. ఆగ్రహం స్థానంలో సంయమనాన్ని పాదుకొల్పాయి. హింసను ఆశ్రయించరాదన్న కేసీఆర్ ధృఢ సంకల్పం విజయం సాధించింది. దక్షిణాఫ్రికాలో శ్వేతజాతీయుల పాలననుంచి నల్లజాతిని విముక్తి చేసిన నెల్సన్ మండేలా కూడా ఇక్కడ మనకు గుర్తుకొస్తారు.

కేసీఆర్.. మొక్కవోని గాంధేయవాది!
నిరాహార దీక్ష...

కేసీఆర్ పాటించిన అహింస, అగ్ని పరీక్షలకు ఇది పతాక సన్నివేశం. ఫలితం దైవాధీనం.. కేంద్రం ఎలా స్పందిస్తుందో తెలియదు. పార్లమెంటులో బలం లేదు. అసెంబ్లీలోనూ బలం లేదు. కేవలం ప్రజాబలాన్ని నమ్ముకుని దీక్ష ప్రారంభించారు. ఎన్నో వ్యంగ్యాలు.. వక్రీకరణలు..అయినా చెక్కు చెదరలేదు. ఫలితం తెలంగాణ ప్రకటన సాధన. తెలంగాణ రాష్ర్టాన్ని అనివార్యం చేసిన చారిత్రక ఘటన అదే. ఆ తర్వాత కేంద్రం వెనక్కిపోయినా ముందుకు పోయినా తెలంగాణ ఆవిర్భావానికి పునాది అదే. ప్రజలకు కొండంత ధైర్యాన్ని, సాధించగలమనే నమ్మకాన్ని కల్పించిందీ కూడా అదే. ఆ తర్వాత జరిగిన పోరాటాలన్నీ దానికి అనుబంధ ఘటనలే!

కేసీఆర్....చరిత్రకారుడు! జాతిపిత..

2009లోనే తెలంగాణ ప్రకటన రాగానే జనమంతా పలికిన ఒకే ఒక్కమాట. తెలంగాణ జాతిపిత... అది ఏదో తెచ్చిపెట్టుకున్న మాట కాదు. ఈ జాతికి దాని గొప్పతనాన్ని నూరిపోసిన వాడు.. తెలుగు తల్లి వంటి మోహావేశ బంధనాలను బద్దలు కొట్టిన వాడు.. విముక్తి ప్రణాళిక రాసిన వాడు..కష్టంలో సాంత్వన పలికిన వాడు...యుద్ధంలో ముందు నిలిచినవాడు..వెన్నంటి ధైర్యం చెప్పిన వాడు.. పోరాడి విజయపతాక ఎగురవేసిన వాడు..కాబట్టే కేసీఆర్ నిస్సందేహంగా తెలంగాణ జాతిపిత!!!

ఒక్క పిలుపుతో ...

నేను ఒక్కటే మాట మనవి చేస్తున్న. పట్టుదలతోటి ఉన్నం కాబట్టే ఇయాల ఇక్కడిదాక మనం రాగలిగినం. కేంద్రం మంచిమాటతోని వస్తె వస్తది. రాకపోతె కచ్చితంగా మహోగ్రమైనటువంటి తెలంగాణ ఉద్యమ నిర్మాణం జరుగుతది. దానికి మీకు ఎప్పటికప్పుడు సందేశం వస్తది. అన్ని వర్గాల ప్రజలు, ఉద్యోగులు, విద్యార్థులు అందరం కలిసి సత్యాగ్రహంనుంచి మొదలు పెడితే మహోగ్రరూపం దాల్చి పూర్తిగ ప్రభుత్వ పరిపాలనను కూడా స్తంభింప చేస్తం. భూకంపం పుట్టించి అయినా.. ఆకాశం బద్దలు కొైట్టెనా సరే.. తెలంగాణ రాష్ట్రం సాధించి తీరాలె.

దాం ట్ల మాత్రమే మనకు విముక్తి ఉన్నది తప్ప ఇంక దేంట్ల లేదు. మన దారి మనం చూసుకోవాలె.. ఉద్యమం చేయాలె.. పోరాటాలు చెయ్యాలె.. త్యాగా లకు సిద్ధపడాలె.. తెలంగాణ తెచ్చుకోవాలె మన సకల సమస్యలకు దాంట్లోనే పరిష్కారం ఉంది.- 25 లక్షల మంది హాజరైన వరం గల్ మహాగర్జనలో కేసీఆర్ సందేశమిది. ఈ సభ ద్వారా తెలంగాణ ఉద్యమ ఆకాంక్ష ఎత్తు లోతు ప్రపంచానికి అర్థమైంది. భూగోళం మీద జరిగిన పది మహా ప్రదర్శనల్లో ఈ సభ చోటు చేసుకుంది. ఆ తర్వాత అంచెలంచలుగా ఉద్యమం నిర్మాణం జరగడం.. పతాక సన్నివేశంగా సకల జనుల సమ్మె ప్రభుత్వ స్తంభనకు దారితీసి ఇక తెలంగాణ ఇవ్వడం అనివార్యం అని కాంగ్రెస్ నిర్ణయానికి రావడం మనకు తెలుసు.

కేసీఆర్.. ప్రజా ఉద్యమకారుడు!
తనను తాను హింసించుకుని..

ఇక ఉద్యమం చల్లారుతున్న ప్రతి సందర్భంలోనూ కేసీఆర్ టీఆర్‌ఎస్ ఉప ఎన్నికలు తెచ్చి అగ్నిపరీక్షలకు సిద్ధపడ్డారు. గాంధీ ఇలాంటి సందర్భాల్లో సత్యాగ్రహం, ఉపవాసాలతో ప్రజలతో చైతన్యం నింపేవారు. మారిన కాల పరిస్థితులకు అనుగుణంగా కేసీఆర్ ఉప ఎన్నికల పరీక్షకు నిలిచారు. వాటి ద్వారానే తెలంగాణ వాదాన్ని ప్రకటించగలమని ఆయన విశ్వసించారు. ఒకటి రెండు సార్లు ఇబ్బంది పడ్డా అంతిమంగా తెలంగాణ ఉద్యమంలో ఉప ఎన్నికలే కీలక పాత్ర వహించి తెలంగాణ వాడిని వేడినీ చాటి చెప్పాయి.

తొలిసారి 2006లో కేసీఆర్ కేంద్రమంత్రి పదవికి రాజీనామా చేసి ఉప ఎన్నికకు సిద్ధపడడం ఒక సాహసం. వాస్తవానికి అప్పటి పరిస్థితులు టీఆర్‌ఎస్‌కు అనుకూలంగా లేవు. సీమాంధ్ర సీఎం టీఆర్‌ఎస్ ఎమ్మెల్యేలను లాగేసి పార్టీని భూస్థాపితం చేయాలని కంకణం కట్టుకున్నాడు. మరోవైపు అయిన వాళ్ల ఆరళ్లు. ఏం సాధించావనే సాధింపులు. పదవుల కోసం తెలంగాణ వదిలేశాడన్న అపనిందలు.. అన్నింటికీ కేసీఆర్ ఇచ్చిన ఏకైక జవాబు ఉప ఎన్నిక. తనను తాను ఫణంగా పెట్టడం..30 ఏండ్ల రాజకీయ జీవితాన్ని కూడా మొత్తంగా ఒడ్డడం ఇందులో అంశం. ఎందుకు ఎన్నిక అవసరమో ప్రజలకు వివరించారు.

తెలంగాణకు ఇది రిఫరెండం అని ప్రకటించి ఘన విజయం సాధించారు. గాంధీ చేసిన ఉపవాసవ్రతంలాంటిదే ఇదికూడా. ఆ తర్వాత సాధారణ ఎన్నికలలోపలే మరో భారీ ఉప ఎన్నికల పర్వం. ఎదురుదెబ్బలు తాకినా లక్ష్యం నెరవేరింది. 2004లో కాంగ్రెస్‌తో కలిస్తే పడ్డ ఓట్లు ఎన్నో..టీఆర్‌ఎస్ సొంత ఓటు బ్యాంకు ఎంతో తేటతెల్లమైంది. ఆ ఓటు బ్యాంకు మీద ఆశ టీడీపీతో తెలంగాణ తీర్మానం చేయించింది. తెలంగాణకు శాశ్వతంగా కట్టుబడి ఉండాల్సిన పరిస్థితి కలిగించింది. తెలంగాణ ప్రకటన తర్వాత చేసిన రాజీనామాలు తద్వారా వచ్చిన ఉప ఎన్నికలు వాటిలో సాధించిన మెజారిటీ చరిత్రకే కొత్త భాష్యం చెప్పాయి. కొన్ని పార్టీల పతనానికి బీజం వేశాయి.

నలుగురు నాయకులు.. మార్గం ఒకటే!

స్వరాజ్య సాధన అంటే ఇతరులను చంపేసి సాధించడం కాదు. నిరంతర ఆత్మత్యాగాలతో కూడిన స్వచ్ఛంద ఉద్యమంతో సాధించేది. అహింస అనే ఆయుధంతోనే మనం పోరాడుతున్నాం.. పోరాడాలి కూడా. ఎందుకంటే మన దగ్గర సత్యం అనే దీక్ష ఉంది. సత్యాగ్రహం అనే మార్గం ఉంది

- మహాత్మా గాంధీ

మనం మొట్టమొదటగా చెబుతున్నది.. మనం అమెరికన్ పౌరులం.. అలాగే మనం హింసను ప్రోత్సహించం. అమెరికా ప్రజాస్వామ్యం ఇచ్చిన అత్యుద్భుత ఆయుధం ఆందోళన చేసే హక్కు. దాన్నే వినియోగించి జాత్యహంకారాన్ని బద్దలు కొడదాం. ఈ మార్గంలో మనం విజయం సాధిద్దాం

- అమెరికా నల్లజాతి విముక్తి ప్రదాత

మార్టిన్ లూథర్ కింగ్ మాంట్‌గోమరి ప్రసంగం

ఆత్మాహుతులు అహింసకు ప్రతిరూపాలే. తమను తాము దహించుకుంటున్న బౌద్ధ సన్యాసులు వాస్తవానికి ఆత్మాహుతి దళాలుగా మారిఉంటే వందల మంది శత్రువుల ప్రాణాలు పోయేవి. కానీ వాళ్లు తమ జీవితాలను త్యాగం చేస్తున్నారే తప్ప ఇతరుల ప్రాణాలు తీయడంలేదు. అహింసా మార్గంలో ఇది పరమపవిత్ర ఆచరణ

- దలైలామా

కేసీఆర్.....ఒక దార్శనికుడు!

తెలంగాణ ఉద్యమం పూర్తిగా అహింసాపద్ధతిలోనే నిర్వహిస్తం. నెత్తురు చుక్క రాలనివ్వం. హింసాత్మక ఘటనలకు ఎవరు పాల్పడినా తీవ్రంగా వ్యతిరేకిస్తం. ఉద్యమం శాంతియుతంగా రాజ్యాంగబద్ధంగా సాగుతుంది. సంకీర్ణయుగంలో ఉన్న అవకాశాలను అందిపుచ్చుకుని పార్లమెంటులో సీట్లు సాధించడం ద్వారా తెలంగాణ రాష్ర్టాన్ని సాధిస్తం..

- జలదృశ్యం, కరీంనగర్ సింహగర్జనలో కేసీఆర్ ప్రసంగ

ఆక్రమణల క్రమబద్ధీకరణకు ఆద్యుడు బాబే!

-చంద్రబాబు హయాంలోనే పలు జీవోలు జారీ
-కావల్సినవారికి వేల ఎకరాల ధారాదత్తం
-నాలుగాకులు ఎక్కువే చదివిన వైఎస్
-జీవో 166తో పెద్దలకు భారీగా లాభం
-అనేక కేసులు.. వివాదాలు.. పెండింగ్‌లో ఫైళ్లు
-ప్రక్షాళనకు సిద్ధమైన తెలంగాణ సర్కార్
-మరో 3 నెలల్లో భూ అక్రమ బాగోతాలకు చెక్
-తదుపరి కబ్జాలపై పీడీ యాక్ట్‌కూ సిద్ధం
-భూముల క్రమబద్ధీకరణపై విపక్షం వింత ధోరణి

ప్రైవేటు వ్యక్తులు, సంస్థల ఆధీనంలో ఉన్న ప్రభుత్వ స్థలాలను క్రమబద్ధీకరించేందుకు, తద్వారా రాష్ట్రంలో భూ అక్రమాలకు చరమగీతం పాడేందుకు తెలంగాణ సర్కారు సంకల్పిస్తే.. విపక్షంమాత్రం వింత ధోరణితో విమర్శనాస్ర్తాలు సంధిస్తున్నదన్న అభిప్రాయాలు వ్యక్తమవుతున్నాయి. రాష్ట్రంలో వేల దరఖాస్తులను వేల సంఖ్యలో వివాదాలు చుట్టుముట్టిన నేపథ్యంలో.. అంతే స్థాయిలో కోర్టు వివాదాల్లో నలుగుతున్న సమయంలో వాటన్నింటికీ పరిష్కార మార్గంగా కేసీఆర్ సర్కారు ముందుకు తెచ్చిన భూముల క్రమబద్ధీకరణపై ప్రతిపక్షాలు లేనిపోని రాద్ధాంతం చేస్తున్నాయని పలువురు నిపుణులు విమర్శిస్తున్నారు. 

పేదలకు ఉచితంగా, వివిధ స్థాయి విస్తీర్ణాల్లో భూములు స్వాధీనంలో ఉన్నవారికి నిర్దిష్ట మార్కెట్ రేట్ ప్రకారం క్రమబద్ధీకరణకు అవకాశం కల్పిస్తే.. అదేదో చేయరాని పని అన్నట్లు బురద జల్లుతున్నారని అంటున్నారు. నిజానికి ఇదే అంశంపై ఎవరేం చేశారో పరిశీలిస్తే.. అసలు వాస్తవాలు బయటపడుతాయని తేల్చేస్తున్నారు. తెలంగాణలో సర్కారీ స్థలాలను అమ్మినదెవరు? ఆ అమ్మకం ద్వారా వచ్చిన నిధులను దారి మళ్లించినదెవరు? అసలు ఆ స్థలాలపై హక్కులెవరివి? వాటిని ఎవరికి హస్తగతం చేశారు? ఇందుకు ఉద్దేశించిన క్రమబద్ధీకరణ కార్యక్రమాలు ఎవరు మొదలుపెట్టారు? వాటిని సర్కారీ దందాగా ఎవరు మార్చారు? కార్యక్రమం ముసుగులో ఎవరు తమ అనుయాయులకు లబ్ధి చేకూర్చుతూపోయారు?

ప్రస్తుతం పెండింగ్‌లో ఉన్న వేల దరఖాస్తులకు.. వాటిపై కోర్టుల్లో నానుతున్న వేల దరఖాస్తులకు ఎవరు కారణం? ఇటువంటి కొన్ని ప్రశ్నలు వేసుకుంటే.. వేళ్లన్నీ నాటి ఉమ్మడి రాష్ట్రంలో పాలనాపగ్గాలు చేపట్టిన చంద్రబాబు నాయుడు, వైఎస్ రాజశేఖర్‌రెడ్డి వైపే చూపిస్తున్నాయి. కబ్జా స్థలాల క్రమబద్ధీకరణ పేరుతో 1995 నుంచే మొదలైన ఈ క్రమబద్ధీకరణ దందా ముసుగులో గడిచిన ఏండ్ల కాలంలో ప్రభుత్వ భూములు, యూఎల్సీ, సర్‌ప్లస్ వంటి అన్ని రకాల భూములనూ తెగనమ్మేశారు. తమవారు అనుకున్న వారికి పేదల ముసుగులో అగ్గువకు పట్టాలు కట్టబెట్టేశారు.

ఈ పరిస్థితి మారాలనే తెలంగాణ ప్రజలు కోరుకుంటున్నారు. తెలంగాణలో భూ అక్రమాలకు తావు లేకుండాచేసి ఆదర్శంగా నిలిపినప్పుడే పారిశ్రామికాభివృద్ధి సాధ్యమని, పెట్టుబడులు రాకకు సానుకూల వాతావరణం నెలకొంటుందని సీనియర్ ఐఏఎస్, టాస్క్‌ఫోర్స్ కమిటీ ఆన్ ల్యాండ్ చైర్మన్ ఎస్‌కే సిన్హావంటి అధికారులు కూడా చెబుతున్నారు. అలాంటి నిపుణుల సూచనలను అమలు చేసే దిశలో ప్రభుత్వం అడుగులు వేస్తున్నది.

1995 లోనే మొదలైన క్రమబద్ధీకరణ పర్వం

భూములను క్రమబద్ధీకరించడం 1995లోనే మొదలైంది. పరిశ్రమల పేరుతో, స్వచ్ఛంద సంస్థల ముసుగులో, ఉపాధి కల్పన వంకతో వ్యక్తులకు/సంస్థలకు యథేచ్ఛగా కట్టబెట్టారు. ఇలా ఆక్రమణల్లో ఉన్నవారిలో అత్యధికులు అప్పట్లో టీడీపీ కార్యకర్తలే అధికంగా ఉండటంతోనే వారికి మేలు చేకూర్చేందుకు నాటి సీఎం చంద్రబాబు కబ్జాలకు గురైన స్థలాలను క్రమబద్ధీకరించే ఉపాయం కనుగొన్నారనే విమర్శలు వచ్చాయి. అలా ఈ పథకం సృష్టికర్త ఒక విధంగా చంద్రబాబు నాయుడేనని పలువురు వ్యాఖ్యానిస్తున్నారు.

యూఎల్సీ భూములకు ఎసరు

1976లో అమల్లోకి వచ్చిన పట్టణ భూగరిష్ఠ పరిమితి చట్టాన్ని అమలు చేయడంద్వారా ప్రభుత్వ ఖాతాలో వేల ఎకరాలు చేరాయి. కానీ వాటిని ఆక్రమించుకున్న వారికి ధారాదత్తం చేసేందుకు ఊతమిచ్చిన ఘనత కూడా చంద్రబాబునాయుడిదేననే అభిప్రాయాలు రెవెన్యూ వర్గాల్లో ఉన్నాయి. యూఎల్సీ కింద రికార్డుల్లో పేర్కొన్న భూముల్లో రియల్టర్లు, అక్రమార్కులు లేఅవుట్లు వేసి అమాయకులకు విక్రయించారు. హైదరాబాద్, రంగారెడ్డి జిల్లాల్లో యూఎల్సీ చట్టం ద్వారా 11,894 ఎకరాలను స్వాధీనం చేసుకున్నారు. ఉమ్మడి ఆంధ్రప్రదేశ్ రాష్ట్ర ప్రభుత్వం జారీ చేసిన ఉత్తర్వుల ద్వారా 3,839 ఎకరాల వరకు క్రమబద్ధీకరించారు.

వైఎస్ హయాంలో పెద్ద దందా

2004 తర్వాత పాలనా పగ్గాలు చేపట్టిన వైఎస్ రాజశేఖర్‌రెడ్డి కూడా పేదలకు మేలు చేస్తామంటూ జీవో నం.166 తీసుకొచ్చారు. ఇది సాగించిన దందా అంతాఇంతా కాదు. 80 గజాల లోపు స్థలాలను ఉచితంగా క్రమబద్ధీకరించే లక్ష్యాన్ని పేర్కొంటూనే బడాబాబులకు మేలు కలిగించారని, పేదల దరఖాస్తులను పెండింగ్‌లో పెట్టి 250 గజాలకు పైగా, 500 గజాలకు పైగా ఉన్న స్థలాలను రెగ్యులరైజ్ చేసుకునేందుకు సంపన్న వర్గాలకు తోడ్పాటునందించారని విమర్శలు ఉన్నాయి. హైదరాబాద్ జిల్లాలో 358 ఎకరాలకుపైగా క్రమబద్ధీకరించినా.. ప్రభుత్వ ఖజానాకు వచ్చిన ఆదాయం మాత్రం రూ.54 కోట్లు మాత్రమే! తెలంగాణలో జీవో 166కింద క్రమబద్ధీకరణకు 1,44,348 దరఖాస్తులొచ్చాయి.

వాటిలో 80 గజాల లోపు ఉన్న స్థలాలకు సంబంధించి 74,747దరఖాస్తులు, 81 నుంచి 250 గజాల లోపు స్థలాల క్రమబద్ధీకరణకు 50,232 దరఖాస్తులు, 251నుంచి 500 గజాలలోపు స్థలాల క్రమబద్ధీకరణకు 13,692 దరఖాస్తులు, 501 నుంచి 2000 గజాల దాకా 5677 దరఖాస్తులు ఉన్నాయి. వీటిలో 13,628 దరఖాస్తులను పరిష్కరించి క్రమబద్ధీకరణ ఉత్తర్వులను జారీచేశారు.

జీవోల కథ

-చంద్రబాబు హయాంలో 20.10.1995న జీవో నం.508 జారీతోనే స్థలాల క్రమబద్ధీకరణ షురూ అయ్యింది. అప్పట్లో 45 రోజుల్లో దరఖాస్తు చేసుకున్న వారికేనని స్పష్టంచేశారు. దీంట్లో నివాస స్థలాలతోపాటు ఇండస్ట్రియల్ వినియోగ ప్లాట్లకూ అవకాశం కల్పించారు. మళ్లీ జీవో నం.515, తేదీ 19.04.2003 విడుదలైంది.

-యూఎల్సీ స్థలాల క్రమబద్ధీకరణకూడా ఆయన హయాంలోనే మొదలైంది. జీవో 455, 456లను 29.07.2002లో, జీవో 183ని 15.02.2006న, జీవో 603ను 22.04.2008న, జీవో 615ను 26.04.2008న, జీవో 747ను 18.06.2008న జారీ చేశారు.

-వైఎస్ అధికారంలోకి వచ్చిన కొంతకాలానికే 2005 ఆగస్టు 29న జీవో నం.1601 ద్వారా దందా మొదలుపెట్టారు. ఆయన కూడా ఇండస్ట్రియల్ స్థలాలకు అవకాశం ఇచ్చారు. ఓ అడుగు ముందుకేసి 501 నుంచి 1000 గజాల వరకు రిజిస్ట్రేషన్ ధరలో 50 శాతానికే కట్టబెట్టారు. 1001 గజాలకు పైగా ఉన్న వాటికి మాత్రమే అప్పటి రిజిస్ట్రేషన్ ధరలో క్రమబద్ధీకరించారు. పరిశ్రమలకు కూడా 500 గజాల వరకు 2003 నాటి రిజిస్ట్రేషన్ ధర ప్రకారం, 501 నుంచి 1000 గజాల వరకు అప్పటి రిజిస్ట్రేషన్ విలువలో 75 శాతానికి, 1001 గజాలకు పైగా ఉండే స్థలాలకు మాత్రం రిజిస్ట్రేషన్ విలువ ఆధారంగా చేపట్టారు.

దీనివల్ల ప్రభుత్వం తీవ్రంగా నష్టపోవల్సి వచ్చింది. ఏడాది తిరగక ముందే 2006 జూన్ 8న జీవో 674 వచ్చింది. అంతకు ముందు ధరల ప్రకారమే రెగ్యులరైజ్ చేశారు. 2008 ఫిబ్రవరి 16న జీవో 166ను తీసుకొచ్చి ప్రభుత్వ భూములను కొల్లగొట్టేశారు. పేదల పేరిట పెద్దలకు వందలాది ఎకరాలను కట్టబెట్టారు.
వేలం పేరిట వేల ఎకరాలు మాయం: చంద్రబాబు అధికారం కోల్పోవటానికి ఏడాదిముందు ప్రభుత్వ భూముల వేలానికి తెరతీశారు. 2003లో హుడా ఆధ్వర్యంలో అన్ని రకాల ప్రభుత్వ భూముల వేలాలను కొనసాగించారు. వేలంలో పెద్ద ఎత్తున గోల్‌మాల్ జరిగిందన్న ఆరోపణలున్నాయి.గోప్యత పాటించి, తమ అనుయాయులకు దక్కేటట్లుగా చేశారని అప్పట్లో పెద్ద ఎత్తున దుమారం చెలరేగింది.

చరమ గీతం పాడాల్సిందే:

భూ అక్రమాలకు తెర దించాలనే గట్టి డిమాండ్ స్వరాష్ట్రం ఏర్పడిన తర్వాత ముందుకు వచ్చింది. ప్రభుత్వం కూడా ఆ దిశగానే ఆలోచించింది. ఆక్రమణలకు చరమగీతం పాడేందుకు అఖరి అంకాన్ని సీఎం కే చంద్రశేఖర్‌రావు ప్రారంభించారు. మూడు నెలల కాలంలో మరో కబ్జా బాగోతం ఉండొద్దని, అన్యాక్రాంతానికి ప్రయత్నిస్తే పీడీ యాక్ట్‌ను ప్రయోగించాల్సిందేనంటూ జీవో నం.58, 59, 60లను విడుదల చేశారు. స్థలాల క్రమబద్ధీకరణకు ఈ నెల 20లోపు దరఖాస్తు చేసుకోకపోతే స్వాధీనం చేసుకుంటామని ప్రకటించారు.

(నమస్తే తెలంగాణ దినపత్రిక సౌజన్యంతో)

జై తెలంగాణ! జై జై తెలంగాణ!

ఉమ్మడి విద్యామండలిలో...ఆంధ్రా జులుం...!?

క్రైస్తవ సోదరులకు

క్రిస్మస్ పర్వదిన శుభాకాంక్షలు!

ఉన్నత విద్యామండలిలో ఉద్యోగుల విభజన ప్రక్రియ ఇంకా పూర్తికాకపోవడంతో తెలంగాణ ఉద్యోగులపై ఆంధ్ర అధికారులు జులుం ప్రదర్శిస్తున్నారు. తెలంగాణ ఉన్నత విద్యామండలి (టీఎస్సీహెచ్‌ఈ)కి సహకరిస్తున్నారన్న సాకుతో ఉద్యోగుల జీతాలను నిలిపేస్తున్నారు. ఉమ్మడి నిధుల్లో తెలంగాణకు సంబంధించిన 48 శాతం నిధులున్నా ఇష్టారాజ్యంగా వ్యవహరిస్తున్నారు.
21వ శతాబ్దపు గురుకులానికి కోఆర్డినేటర్‌గా పనిచేస్తున్న సత్యనారాయణకు నవంబర్ నెల జీతం ఇంకా ఇవ్వలేదు. ఉమ్మడి విద్యామండలి జీతం తీసుకొంటూ.. తెలంగాణ విద్యామండలికి పనిచేస్తున్నారని సాకులు చూపిస్తున్నారు. ఆయన పేరును ఉద్యోగుల రిజిస్టర్ నుంచి తొలగించారు. బయోమెట్రిక్ యంత్రం నుంచి తన వేలిముద్రలను కూడా తొలగించినట్లు సత్యనారాయణ వెల్లడించారు. గురుకులానికి కోఆర్డినేటర్‌గా పనిచేస్తున్న ఆయన, గతంలో తెలంగాణ ఉద్యమంలో పాల్గొన్నారు.

ఆయన 2004లో టీఆర్‌ఎస్ తరఫున ఎంపీగానూ పోటీచేశారు. 2007లో 21వ శతాబ్దపు గురుకులానికి కోఆర్డినేటర్‌గా నియమితులయ్యారు.

రాష్ట్ర విభజన తర్వాత...

తెలంగాణ ఉన్నత విద్యామండలి ఏర్పాటైనా... దానికి సిబ్బంది, విధులు, నిధుల విభజన జరుగలేదు. దీంతో టీఎస్సీహెచ్‌ఈకి సత్యనారాయణ...తనవంతు సహాయ సహకారాలు అందిస్తున్నారు.

అటు విభజన పూర్తికాకపోవడంతో ఉమ్మడి ఉన్నత విద్యామండలి తరఫున సమాచారహక్కు చట్టం, మానవ వనరుల అభివృద్ధి విభాగం వంటి కార్యకలాపాలు కూడా సత్యనారాయణ పరిధిలోనే కొనసాగుతున్నాయి. 

ఇప్పుడు దాన్నే సాకుగా చూపిస్తూ ఆయన నవంబర్ జీతాన్ని నిలిపివేసి ఆయనను మానసికంగా ఇబ్బందికి గురిచేస్తున్నారు. ఉమ్మడి విద్యామండలిలో పనిచేస్తున్న తెలంగాణ సిబ్బంది తెలంగాణ విద్యామండలి కోసం పని చేయవద్దంటూ ఏపీ అధికారులు హుకుం జారీచేశారు.

ఒకవేళ అలాచేస్తే రెగ్యులర్ ఉద్యోగులను విధుల నుంచి తొలగిస్తామని, కాంట్రాక్ట్ సిబ్బంది జీతాలు నిలిపేస్తామని బెదిరిస్తున్నారు. దీనిపై తెలంగాణ ఉన్నత విద్యామండలి చైర్మన్ పాపిరెడ్డి స్పందించారు. రెండు, మూడు రోజుల్లో జీతాల చెల్లింపుపై సానుకూల నిర్ణయం రాకపోతే పునర్వ్యవస్థీకరణ చట్టం సెక్షన్ 75 ప్రకారం చర్యలు తీసుకొంటామని టీఎస్సీహెచ్‌ఈ చైర్మన్ పాపిరెడ్డి, వైస్‌చైర్మన్లు వెంకటాచలం, మల్లేశం హెచ్చరించారు.

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!

ఏపీఎండీసీ నిధుల పంపకానికి...ఆంధ్రా సర్కారు...నో...

-నిధుల సర్దుబాటుకు ససేమిరా
-రుణమిస్తూ గట్టెక్కించే యత్నం
-అడ్డదారిలో ఏపీఎండీసీకి 15 కోట్లు విడుదల

ఆంధ్ర ప్రదేశ్ మినరల్ డెవలప్‌మెంట్ కార్పొరేషన్ (ఏపీఎండీసీ)లో పుష్కలంగా ఉన్న నిధులను జనాభా ప్రాతిపదికన పంచడానికి మనసొప్పని ఆంధ్రా ఆధిపత్యం వైపరీత్యాన్ని ప్రదర్శిస్తున్నది. ఆంధ్ర ప్రదేశ్ రాష్ట్ర పునర్వ్యవస్థీకరణ చట్టం-2014లోని నిబంధనలను తుంగలో తొక్కి, తెలంగాణకు రావాల్సిన వాటాను పంచకుండా ఏవో సాకుల్ని ఏపీ ప్రభుత్వం చూపుతున్నది. ప్రధానంగా ప్రభుత్వరంగ సంస్థల నిధుల పంపకాల్లో విభిన్నంగా వ్యవహరిస్తున్నది.

ఏపీఎండీసీలో రూ.700 కోట్లకు పైగా నిధులు బ్యాంకు ఉమ్మడి ఖాతాల్లో నిల్వ ఉన్నాయి. 
వాటిని జనాభా ప్రాతిపదికన పంపిణీ చేసుకోవాలని చట్టం చెబుతున్నది. అయినా డీమెర్జర్ ప్లాన్‌ను ఆమోదించకుండా, నిపుణుల కమిటీపై ఒత్తిడి తీసుకొస్తున్నారు. ఆరు నెలలు పూర్తయినా నిధులను మాత్రం ఇవ్వకుండా తప్పించుకునేందుకు కుట్రలు సాగిస్తున్నారు.

జీరో బ్యాలెన్స్‌తోనే తెలంగాణ ఉద్యోగుల విభజన చేపట్టడంతో, ఆర్థిక ఇబ్బందుల మధ్య తెలంగాణ మినరల్ డెవలప్‌మెంట్ కార్పొరేషన్‌ను ఏర్పాటు చేసుకున్నారు.

ఉమ్మడి రాష్ట్ర ఖాతాల్లోని నిధులను దొడ్డిదారిన డ్రా చేస్తున్న ఉదంతాలను తెలంగాణ ప్రభుత్వం గుర్తించడంతో ఆంధ్రా సర్కారు రూట్ మార్చింది. 

అడ్డదారుల్లో నిధులను వినియోగించుకోవడం సాధ్యం కాకపోవడంతో జీఓ నం.400, తేదీ.17-12-2014 ద్వారా తాజాగా ఏపీఎండీసీకి ఆంధ్రా సర్కారు రూ.16 కోట్లు రుణంగా ఇచ్చింది.

ఓ సంస్థకు ప్రభుత్వమే రుణమిచ్చిన వైనం ఎక్కడా జరగలేదని, ఇదే తొలిసారిగా అధికారులు చెప్పుకుంటున్నారు.

తమ ప్రాంతం నుంచే ఆదాయం అత్యధికంగా వస్తున్నదనే ఏకైక కారణాన్ని తెర మీదికి తీసుకొస్తూ, ఉమ్మడి ఖాతాల్లోని నిధులను జనాభా ప్రాతిపదికన పంచుకోవడానికి మాత్రం ముందుకు రాకపోవడం గమనార్హం.

19 ప్రభుత్వ రంగ సంస్థల్లో

ఒకటీ, రెండు సంస్థలకు మాత్రమే ఆంధ్రా ప్రాంతం నుంచి ఆదాయం ఎక్కువగా వస్తున్నదని,

మిగిలిన అన్ని సంస్థలకూ తెలంగాణ పది జిల్లాల నుంచే 70 శాతానికి పైగా నిధులు సమకూరుతున్నాయని

అధికారులు పేర్కొన్నారు.

అన్ని సంస్థల నుంచి జనాభా ప్రాతిపదికన 5 శాతం వాటా ఆంధ్రాకు తెలంగాణ ప్రభుత్వం ఇవ్వడం ద్వారా కొన్ని వేల కోట్ల రూపాయలు తెలంగాణ ప్రభుత్వం నష్టపోతున్నది.

కానీ ఏపీఎండీసీలో మాత్రం జనాభా ప్రాతిపదికన కాకుండా లొకేషన్ పద్ధతిన పంచాలని కోరుకోవడం అనైతిక చర్య అని తెలంగాణ ఉద్యోగులు మండిపడుతున్నారు.

ఇకనైనా చట్ట ప్రకారం రూపొందిన ఏపీఎండీసీ డీమెర్జర్ ప్లాన్‌ను ఆమోదించేందుకు ప్రయత్నించాలని ఇరు రాష్ట్రాల ప్రభుత్వాలను ఉద్యోగులు కోరుతున్నారు.

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!

ముంపు తెలంగాణలో.. పరిహారం ఆంధ్రలో...???!!!

-పులిచింతలలో మునిగిన మన అటవీ భూములపై సీమాంధ్ర కుట్ర
-నల్లగొండ జిల్లాలో ముంపునకు గురైన 375 హెక్టార్లు
-పరిహారంగా ఏపీలోని ప్రకాశం జిల్లాలో భూమి కేటాయింపు

పులిచింతల ప్రాజెక్టు.. కృష్ణానదిపై నల్లగొండ-గుంటూరు జిల్లాల సరిహద్దుల్లో నిర్మితమైన జలాశయం. రాష్ట్రంలోని నల్లగొండ జిల్లాలో 13,915 ఎకరాలు తనలో కలిపేసుకున్న ఈ ప్రాజెక్టు మన రాష్ర్టానికి ఒరగబెడుతున్న ప్రయోజనం శూన్యం. కృష్ణా, గుంటూరు జిల్లాల్లో మాత్రం 13 లక్షల ఎకరాలకు సాగు నీరందించే లక్ష్యంతో దీన్ని నిర్మించారు సీమాంధ్ర పాలకులు. 1988లో ఎన్టీఆర్ చేతుల మీదుగా తొలిసారి శంకుస్థాపన చేసుకుని, 2004లో వైఎస్ చేతులతో మరోసారి శిలాఫలకం వేయించుకుంది. 

2006లో అన్ని అనుమతులూ తెచ్చుకుని కేఎల్ రావు సాగర్ ప్రాజెక్టుగా పేరు మార్చుకుంది. 2013 డిసెంబర్ 7న అసంపూర్తి నిర్మాణాన్నే ఆగమేఘాల మీద ప్రారంభించారు నాటి సీఎం కిరణ్‌కుమార్‌రెడ్డి. రూ.1850 కోట్ల విలువైన ఈ ప్రాజెక్టుతో ముంపునకు గురైన నల్లగొండ జిల్లాకు ఉపయోగం లేదు.

నిర్మాణం డిజైన్‌నే తమకు అనుకూలంగా మలుచుకున్న నాటి పాలకుల దుర్బుద్ధి ముంపు ప్రాంతాలకు ఇవ్వాల్సిన నష్టపరిహారం విషయంలోనూ కొట్టొచ్చినట్టు కనిపిస్తున్నది. పరిహారం విషయంలో ఇక్కడి ప్రాంతంపై చిన్నచూపు చూడడమే కాదు.. కోల్పోయిన అటవీ భూములకు పరిహారంగాను సీమాంధ్రలో భూములు కేటాయించడం వెనుక కుట్ర కోణం దాగి ఉందనే అనుమానాలను బలపరుస్తున్నది.

-తెలంగాణకు 375 హెక్టార్ల అటవీ భూమి నష్టం
పులిచింతల ప్రాజెక్టులో నల్లగొండ జిల్లాలోని మేళ్లచెర్వు, మఠంపల్లి, నేరేడుచర్ల మండలాల్లో 13,915 హెక్టార్ల భూమి ముంపునకు గురైంది. మూడు మండలాల్లో 13 గ్రామాలు నిర్వాసిత పల్లెలుగా మారాయి. ఈ ముంపునకు గురైన భూముల్లో జిల్లాలోని 375.27 హెక్టార్ల అటవీ భూములు కూడా ఉన్నాయి. గుంటూరు జిల్లా వైపు సైతం 13 గ్రామాలను ముంపునకు గురి చేసిన ఈ జలాశయం బ్యాక్ వాటర్‌లో అక్కడ కూడా భారీగానే భూములు నీట మునిగాయి. మన రాష్ట్రం వైపు 375 హెక్టార్ల అటవీ భూమితోపాటు ఏపీలోని గుంటూరు జిల్లాలో కూడా 793 హెక్టార్ల అటవీ భూమి ముంపునకు గురైంది.

ఎక్కడైనా అటవీ భూములు ప్రాజెక్టుల్లో నీట మునిగినప్పుడు పరిహారంగా డబ్బులు కాకుండా తిరిగి భూమినే ఇవ్వాలని అటవీశాఖ కోరుతున్నది. ఇక్కడ కూడా అలాంటి పరిస్థితుల్లోనే.. నాటి సమైక్య ప్రభుత్వం పరిహారంగా మొత్తం 1168.27 హెక్టార్లకు బదులు 1170 హెక్టార్ల భూమిని అటవీ శాఖకు అప్పగించింది. అప్పగించిన భూమి మొత్తం ఆంధ్రప్రదేశ్ పరిధిలోని ప్రకాశం జిల్లా అర్ధవీడు మండలం వెలగపాయ గ్రామంలో 587, 588 సర్వే నంబర్లలో ఉంది. రాష్ట్ర విభజన జరగక ముందు జరిగిన ఈ కేటాయింపుతో తెలంగాణ 375 హెక్టార్ల అటవీ భూమిని కోల్పోయినట్లయ్యింది.

అటవీశాఖకు పరిహార భూ కేటాయింపుల కోసం పులిచింతల ప్రాజెక్టు వ్యయం నుంచి కోట్లాది రూపాయలను నాటి ప్రభుత్వానికి చెల్లించి మరీ 1170 హెక్టార్ల భూమి కొనుగోలు చేశారు. నాటి పాలకులు, అధికారులు కుమ్మక్కై కుట్ర పూరితంగానే ప్రకాశం జిల్లాలో భూ కేటాయింపు చేసినట్లు తెలుస్తున్నది. అనవసరంగా మన రాష్ట్రంలోని వ్యవసాయ భూమిని అటవీశాఖకు ఇవ్వడం ఎందుకన్న ఆలోచనతో ఇక్కడి అధికారులు నాడు మిన్నకుండి పోయినట్లు సమాచారం.

నాటి అలసత్వం ఫలితం.. నేడు తెలంగాణ రాష్ర్టానికి చెందిన 375 హెక్టార్ల అటవీ భూమి పక్క రాష్ట్రం లెక్కల్లోకి చేరిపోయింది. ఉపయోగం అంతా తమ ప్రాంతానికే ఉండడంతో ప్రస్తుతం నల్లగొండ జిల్లాలోని నిర్వాసితుల బాగోగులన్నీ చూసుకుంటున్న ఏపీ ప్రభుత్వంపై ఒత్తిడి తెస్తే.. ప్రకాశం జిల్లాలో కేటాయించిన భూమిలో 375 హెక్టార్లను మన రాష్ట్ర ప్రభుత్వం పేరు మీదికి బదిలీ చేసుకోవచ్చనేది నిపుణుల అభిప్రాయం.

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!

ఆప్కోలో తెలంగాణ ఉద్యోగులపై దాడిచేసినా.. ఆంధ్రా ఉద్యోగులపై చర్యలు శూన్యం!!!

-తెలంగాణ అధికారిపై చేయిచేసుకున్న వ్యక్తికి మళ్లీ పోస్టింగ్ ఇచ్చిన ఆంధ్రా అధికారులు

ఆప్కో లో తెలంగాణ ఉద్యోగులపై వివక్ష కొనసాగుతూనే ఉంది. ఉద్యోగులపై దాడులు జరిగినా ఆప్కోలోని ఉన్నతాధికారులు పట్టించుకోవడం లేదు. పైగా దాడుల జరిపిన ఆంధ్రా సిబ్బందికే వత్తాసు పలుకుతున్నారు. హైదరాబాద్‌కు చెందిన కైరంకొండ యాదగిరి అనంతపురంలో డిస్ట్రిక్ట్ట్ మార్కెటింగ్ ఆఫీసర్‌గా పనిచేసేవారు. బదిలీపై రిలీవ్ కావడానికి గత సెప్టెంబర్ 10న అనంతపురం వెళ్లిన ఆయనపై ఆప్కో సేల్స్ మేనేజర్ ప్రకాశ్, మరో ఉద్యోగి దాడికి పాల్పడ్డారు. దీంతో భయాందోళనకు గురైన యాదగిరికి గుండెపోటు వచ్చింది. వెంటనే దవాఖానలో చేర్చడంవల్ల ప్రాణాపాయం తప్పింది. ఆ తర్వాత ఆయనకు సికింద్రాబాద్ డీఎంవోగా పోస్టింగ్ ఇచ్చారు. 
దాడికి పాల్పడిన ప్రకాశ్‌ను సస్పెండ్‌చేసి ఆ తర్వాత నామమాత్రపు దర్యాప్తు జరిపారు. చివరకు అతనిపై ఎలాంటి చర్యలు తీసుకోకుండానే ఆంధ్రా ఉన్నతాధికారులు పోస్టింగ్ ఇచ్చారు. ఆప్కో అనంతపురం డైరెక్టర్ శ్రీనివాసులు ప్రోద్బలంతోనే అతనికి క్లీన్‌చిట్ ఇచ్చినట్లు ఆరోపణలు వినిపిస్తున్నాయి. దాడికి పాల్పడ్డ వారిపై ఎలాంటి చర్యలూ తీసుకోకపోవడంపై రాష్ట్ర ఉద్యోగులు మండిపడుతున్నారు. ఆప్కోను వెంటనే విభజించి, సీమాంధ్రలో ఉన్న తెలంగాణ ఉద్యోగులను రాష్ర్టానికి రప్పించాలని ప్రభుత్వాన్ని కోరుతున్నారు.

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!

చిక్కులు లేని భూసేకరణ తెలంగాణ ప్రభుత్వ లక్ష్యం!!!

వాటర్ గ్రిడ్ ప్రాజెక్టు చేపట్టి నాలుగేండ్లలో రాష్ట్రంలో ప్రతి ఇంటికి నల్లా నీళ్లందిస్తాం. అలా చేయలేకపోతే వచ్చే ఎన్నికల్లో ప్రజల దగ్గరికి వెళ్లి ఓట్లు అడగం.. ఇదీ ముఖ్యమంత్రి కే చంద్రశేఖర్‌రావు అసెంబ్లీలో చేసిన ప్రకటన. ఎంతో ఆత్మవిశ్వాసంతో.. సాహసంతో సీఎం తనకు తాను విధించుకున్న ఈ సవాలును నిజం చేసేందుకు అధికార యత్రాంగం నడుం కట్టింది.

-వాటర్ గ్రిడ్‌కు రైట్ ఆఫ్ వే!
-గుజరాత్ నమూనాలో ప్రత్యేక చట్టం
-న్యాయవివాదాలు తలెత్తకుండా ముందస్తు ఏర్పాటు
-రక్షిత మంచినీరు రాజ్యాంగ బాధ్యతగా పరిగణన
-పైపులైన్లు, రిజర్వాయర్లకు భూమి తప్పనిసరి

వాటర్‌గ్రిడ్ ప్రాజెక్టును విజయవంతం చేసేందుకు ఉన్నతాధికారులు కార్యాచరణ ప్రణాళిక రూపొందిస్తున్నారు. ఇందుకు గుజరాత్ నమూనాను అనుసరించాలని భావిస్తున్నారు. గుజరాత్ రాష్ట్రంలో అక్కడి ప్రభుత్వం వాటర్‌గ్రిడ్ ప్రాజెక్టును విజయవంతంగా అమలు చేయడానికి రైట్ ఆఫ్ వే చట్టం అమలు చేసింది. అదే నమూనాను ఇక్కడా అనుసరించాలని ప్రభుత్వం భావిస్తున్నది.

ప్రధాన సమస్య భూ సేకరణే..

ఇవాళ ప్రభుత్వం ఏ ప్రాజెక్టు చేపట్టాలన్నా భూ సేకరణ పెద్ద సమస్యగా ఉంది. ఎవరికి ఏ చిన్న నష్టం కలిగిందని భావించినా కోర్టులను ఆశ్రయించడం, స్టే తీసుకోవడం పరిపాటిగా మారింది. దాంతో అనేక ప్రాజెక్టులు ఏండ్ల తరబడి ఎక్కడ వేసిన గొంగళి అక్కడే అన్నట్టుగా నిలిచిపోతున్నాయి. ఆ పరిస్థితి వాటర్‌గ్రిడ్ ప్రాజెక్టుకు ఎదురు కాకుండా భూ సేకరణ జరుపాలని ప్రభుత్వం యోచిస్తున్నది.

దీని కోసం గుజరాత్ ప్రభుత్వం అనుసరించిన రైట్ ఆఫ్ వే పద్ధతినే స్వీకరించాలని ప్రాథమికంగా నిర్ణయించినట్లు సమాచారం. ఈ మేరకు భూసేకరణకు ప్రత్యేక చట్టం తెస్తారు. దీనికింద వాటర్ గ్రిడ్ ప్రాజెక్టును ప్రజా ప్రయోజనాలు, తక్షణ అవసరాలు, అత్యవసరాల కింద ప్రకటిస్తారు. ప్రజలకు రాజ్యాంగం ప్రకారం రక్షిత మంచినీరు అందించడం ప్రభుత్వ బాధ్యత. ఈ క్రమంలో వాటర్ గ్రిడ్‌ను అదే కోణంలో పరిగణిస్తే ప్రాజెక్టుకు ఇబ్బంది తలెత్తే అవకాశం ఉండదు.

గుజరాత్‌లో ప్రత్యేక చట్టం..

వాటర్ గ్రిడ్ భూ సేకరణలో సమస్యలు తలెత్తకుండా గుజరాత్ రాష్ట్ర ప్రభుత్వం అక్కడ ప్రత్యేక చట్టాన్ని తెచ్చింది. తాగునీటి పైపులైన్లు 1.5 మీటర్ల లోతున వేసుకోవడానికి వీలుగా తీసుకొచ్చిన ఆ చట్టం వల్ల ప్రాజెక్టు అమలులో ఇబ్బందులు తొలిగిపోయాయి. నిర్దేశించిన గడువులోగా పనులు పూర్తి చేశారు. భూ సేకరణలో ఆటంకాలు లేకుండా చేసుకోవడం వల్లే ప్రాజెక్టు సక్సెస్ అయ్యిందని అధికారులు చెబుతున్నారు.

గుజరాత్‌లో వాటర్ గ్రిడ్ కోసం 2684 కి.మీ. మేరకు బల్క్ పైప్‌లైన్లు, 1.20 లక్షల కి.మీ. డిస్ట్రిబ్యూషన్ పైపులైన్లు, 23693 స్టోరేజ్ హైడ్రాలిక్ నిర్మాణాలను చేపట్టారు. 181 వాటర్ ట్రీట్‌మెంట్ ప్లాంట్లను ఏర్పాటు చేసి ప్రతి రోజూ 290 కోట్ల లీటర్ల నీటిని ప్రజలకు అందిస్తున్నారు. 132 పట్టణాలకు, 11545 గ్రామాలకు నీటి సరఫరా అవుతున్న ఈ వ్యవస్థను అధ్యయనం చేసేందుకు రాష్ట్ర పంచాయత్‌రాజ్, ఐటీ శాఖ మంత్రి కే తారకరామారావు గత అక్టోబర్ 18, 19 తేదీల్లో గుజరాత్‌లో పర్యటించారు. అందుకే అదే విధానాన్ని తెలంగాణలోనూ అమలు చేయడం ద్వారానే ప్రజలకిచ్చిన హామీని నాలుగున్నరేండ్లల్లో పూర్తి చేయొచ్చునని అంచనా వేస్తున్నారు.

గుజరాత్ భూ సేకరణకు అనుసరించిన విధానం

-రైట్ ఆఫ్ వే విధానాన్ని అనుసరించారు.
-భూములకు వాస్తవ మార్కెట్ ధర లేదా భూమికి భూమి ఇచ్చారు.
-గుజరాత్ వాటర్ సప్లయి అండ్ సీవరేజ్ బోర్డు భూ సేకరణ జరిపింది.
-బాధిత రైతులకు ఏడాది పాటు వచ్చే కూలీని ఏకమొత్తంగా చెల్లించారు.
-500 చ.మీ.లకు రూ.20 వేల వరకు చెల్లించారు.
-పంటలు కోల్పోకుండా నాలుగు నెలలు ముందు నోటీసులు ఇచ్చారు.
-నిర్మాణాలకూ కన్జూమర్ ప్రైస్ ఇండెక్స్ లెక్కల ప్రకారం పరిహారం చెల్లించారు.
-సింహభాగం వన్‌టైం సెటిల్‌మెంట్ ద్వారా ముగించారు.
-చట్టం ప్రకారం ఎవరైనా ఈ ప్రాజెక్టుకు భూమి ఇవ్వడం తప్పనిసరి చేశారు.

ఎక్కడెక్కడినుంచి నీరు..?

కృష్ణా, గోదావరి నదులకు సంబంధించి ఎక్కడ, ఏ పాయింట్ నుంచి ఎంత నీటిని తీసుకోవచ్చునన్న దానిపై అధ్యయనం చేశారు. ప్రధానంగా కృష్ణా నది నుంచి జూరాల రిజర్వాయర్, కల్వకుర్తి ఎల్‌ఐఎస్ పాయింట్, శ్రీశైలం రిజర్వాయర్, నాగార్జునసాగర్ రిజర్వాయర్, పాలేరు దగ్గర నాగార్జున్‌సాగర్ ఎడమ కాల్వ(పాక్షికం)ల నుంచి నీటిని తీసుకోవచ్చు. అలాగే గోదావరి నది నుంచి శ్రీరాం సాగర్ ప్రాజెక్టు రిజర్వాయర్, ఎల్లంపల్లి/ప్రాణహిత, దేవాదుల ఎల్‌ఐఎస్, దుమ్ముగూడెం ఎల్‌ఐఎస్‌ల నుంచి తీసుకోవచ్చు. మంజీరా నది నుంచి సింగూరు, నిజాంసాగర్‌ల ద్వారా మంచినీటి సరఫరాకు అవసరమైన నీటిని పొందుతారు.

జనాభాకు తగ్గట్లుగా మంచినీటిని సరఫరా చేసేందుకు మార్గాన్ని ఎంచుకున్నారు. ప్రాంతాలను బట్టి గ్రావిటీ ద్వారా ఎంఎస్ పైపులైన్ల ద్వారా చేయాలని నిర్ణయించారు. అవసరమైన చోట పంపింగ్ విధానానికి రూపకల్పన చేస్తారు. మెయిన్ ట్రాన్స్‌మిషన్ గ్రిడ్ నుంచి జిల్లా కేంద్రాలకు, అక్కడి నుంచి మండల కేంద్రాలకు సరఫరా చేస్తారు. అటు నుంచి గ్రామ స్థాయి వరకు చేర్చాల్సి ఉంటుంది. దీని కోసం పక్కా నిర్వహణ వ్యవస్థలను రూపొందించాలి.

అలాగే ఇంటర్ డిస్ట్రిక్ట్ ట్రాన్స్‌మిషన్ గ్రిడ్, డిస్ట్రిక్ట్ గ్రిడ్, మండల్ గ్రిడ్‌లను మెయిన్ గ్రిడ్‌కు అనుసంధానం చేస్తారు. బ్యాలెన్సింగ్ రిజర్వాయర్లు, సర్వీసు రిజర్వాయర్లు, పంపు హౌజ్‌లు, విద్యుదీకరణ సదుపాయాలు అనివార్యం. మెయిన్ బ్యాలెన్సింగ్ రిజర్వాయర్లు, సర్వీసు రిజర్వాయర్లు, పంపింగ్ స్టేషన్ల నిర్మాణానికి, పైపులైన్ల ఏర్పాటుకు కూడా స్థల సేకరణ జరుపాల్సి ఉంటుంది.

(నమస్తే తెలంగాణ దినపత్రిక సౌజన్యంతో)

జై తెలంగాణ!    జై జై తెలంగాణ!